আমেৰিকাত পুনৰ বন্দুকধাৰীৰ সন্ত্ৰাস: নিৰ্বিচাৰ গুলীচালনাত নিহত ৯ গৰাকী

বন্দুকধাৰীৰ সন্ত্ৰাসে ক্ৰমাৎ ভয়াৱহ ৰূপ ধাৰণ কৰিছে আমেৰিকাত। দেশখনত উদ্বেগজনক হাৰত বৃদ্ধি পোৱা নিৰ্বিচাৰ গুলীচালনাত বিগত সময়চোৱাত প্ৰাণ হেৰুৱাইছে বহু লোকে। আজি পুনৰ আমেৰিকাত সংঘটিত তিনিটা পৃথক গুলীচালনাৰ ঘটনাত দুগৰাকী ছাত্ৰসহ ৯ জন লোকৰ মৃত্যু হোৱাৰ খবৰ প্ৰকাশ পাইছে।

আন্ত:ৰাষ্ট্ৰীয় সংবাদ সংস্থা AFP ৰ বাতৰি অনুসৰি, উত্তৰ কেলিফৰ্ণিয়াৰ ছান ফ্ৰান্সিস্কোৰ দক্ষিণে থকা হাফ মুন বে’ৰ ফাৰ্মত দুটাকৈ গুলীচালনাৰ ঘটনা সংঘটিত হৈছে। এই ঘটনাত ৭ গৰাকী লোকৰ মৃত্যু হোৱাৰ বিপৰীতে ৩ গৰাকী লোক গুৰুতৰভাৱে আহত হৈছে।

ঘটনা সন্দৰ্ভত ছান মাটিও কাউন্টি শ্বেৰিফে এক টুইট যোগে এই বৰ্বৰ কাণ্ডৰ সৈতে প্ৰশাসনে মোকাবিলা কৰিছে বুলি সদৰী কৰিছে। টুইট যোগে কাৰ্যালয়ে ঘটনাত জড়িত থকাৰ সন্দেহত কেইগৰাকীমান সন্দেহজনক লোকক জিম্মাত লোৱা হৈছে বুলি উল্লেখ কৰে।

আনহাতে আন এক গুলীচালনাৰ ঘটনা সংঘটিত হৈছে আইঅ’ৱাৰ ডেছ মইনছত। এক যুৱ প্ৰশিক্ষণ কেন্দ্ৰত সংঘটিত হৈছে এই কাণ্ড। গুলীচালনাত দুগৰাকী ছাত্ৰ নিহত হোৱাৰ লগতে ৩ গৰাকী লোক আহত হয়। আহত সকলৰে দুগৰাকীৰ অৱস্থা সংকটজনক বুলি জানিব পৰা গৈছে।

ডেছ মইন আৰক্ষীয়ে এক বিবৃতিত উল্লেখ কৰা মতে, গুলীচালনাত গুৰুতৰভাৱে আঘাতপ্ৰাপ্ত ১৮ আৰু ১৬ বছৰীয়া ছাত্ৰ দুগৰাকীক চিকিৎসালয়ত ভৰ্তি কৰা হৈছিল যদিও দুয়োগৰাকীৰে চিকিৎসালয়তে মৃত্যু হয়। গুলীচালনা সংঘটিত কৰি দুৰ্বৃত্তই ঘটনাস্থলীৰ পৰা পলায়ন কৰে।