এইবাৰ ভূমিকম্পত কঁপি উঠিল ছিকিম; য়ুকচাম চহৰৰ পৰা ৭০ কিলোমিটাৰ উত্তৰ-পশ্চিমে আছিল অভিকেন্দ্ৰ

সোমবাৰে ৰাতিপুৱাই ভূমিকম্পই জোকাৰি গ’ল ছিকিম।পুৱা প্ৰায় ৪.১৫ বজাত ছিকিমৰ য়ুকচাম চহৰত কম্পন অনুভৱ হয়। ভূমিকম্পৰ প্ৰাবল্য ৰিখটাৰ স্কেলত ৪.৩ আছিল।

ৰাষ্ট্ৰীয় ভূকম্পন কেন্দ্ৰৰ মতে, ছিকিমত ভূমিকম্পৰ কেন্দ্ৰস্থল ভূপৃষ্ঠৰ পৰা ১০ কিলোমিটাৰ গভীৰতাত আছিল। য়ুকচাম চহৰৰ পৰা ৭০ কিলোমিটাৰ উত্তৰ-পশ্চিমত ভূমিকম্পটো সংঘটিত হয়। ফলত এটা বৃহৎ এলেকা কঁপি উঠে।

য়ুকচাম চহৰ ছিকিমৰ ৰাজধানী গেংটকৰ পৰা প্ৰায় ১২০ কিলোমিটাৰ নিলগত। পৰ্যটকসকলে এই পাহাৰীয়া চহৰখন ভ্ৰমণ কৰে। সোমবাৰে পুৱতি নিশা চহৰখনত ভূমিকম্পৰ জোকাৰণি অনুভৱ হয়।

ধাৰণা কৰা হৈছে যে কম্পনৰ মাত্ৰ বেছি নোহোৱাৰ বাবে হয়তো কোনো বৃহৎ ক্ষয়ক্ষতি হোৱা নাই।

Earthquake of Magnitude:4.3, Occurred on 13-02-2023, 04:15:04 IST, Lat: 27.81 & Long: 87.71, Depth: 10 Km ,Location: 70km NW of Yuksom, Sikkim, India for more information Download the BhooKamp App https://t.co/FgmIkxe9Q2@Indiametdept @ndmaindia @Dr_Mishra1966 @Ravi_MoES pic.twitter.com/1FuxFI7Ire

— National Center for Seismology (@NCS_Earthquake) February 13, 2023

ইয়াৰ পূৰ্বে দেওবাৰে আবেলি অসমত মৃদু কম্পন অনুভৱ কৰা হৈছিল। অসমৰ নগাঁও অঞ্চলত আবেলি প্ৰায় ৪.১৮ বজাত ভূমিকম্পটো সংঘটিত হৈছিল। ভূমিকম্পটোৰ প্ৰাবল্য ৰিখটাৰ স্কেলত ৪ আছিল।

উল্লেখ্য যে এসপ্তাহ পূৰ্বে এক শক্তিশালী ভূমিকম্পৰ ফলত তুৰস্ক আৰু চিৰিয়া কঁপি উঠিছিল। ৭.৮ প্ৰাবল্যৰ ভূমিকম্পৰ পিছত কমেও ১০০ বাৰ আফটাৰ শ্বক হৈছিল। ভূমিকম্পত বিধ্বস্ত হোৱা পশ্চিম এছিয়াৰ দুয়োখন দেশত মৃত্যুৰ সংখ্যা আঠ দিনৰ পিছতো অব্যাহত আছে। এতিয়ালৈকে ৩৩ হাজাৰ লোকৰ মৃত্যু হৈছে। মৃত্যুৰ সংখ্যা আৰু বৃদ্ধি হোৱাৰ সম্ভাৱনা আছে।