মেডিকেলত নামভৰ্তিত NEET নিৰ্ধাৰিত আইনৰ বিৰুদ্ধে উচ্চতম ন্যায়ালয়ৰ দ্বাৰস্থ তামিলনাডু চৰকাৰ

ৰাষ্ট্ৰীয় যোগ্যতা তথা প্ৰৱেশ পৰীক্ষা (NEET) ফেডাৰেলিজমৰ উলংঘন আৰু স্বৈৰাচাৰী বুলি দাবী কৰি মেডিকেলত নামভৰ্তিৰ চৰ্ত হিচাপে এই পৰীক্ষাৰ বাবে নিৰ্ধাৰণ কৰা আইনৰ ব্যৱস্থাক প্ৰত্যাহ্বান জনাই তামিলনাডু চৰকাৰে উচ্চতম ন্যায়ালয়ত আবেদন জনাইছে।

সংবিধানৰ অনুচ্ছেদ ১৩১-ৰ অধীনত দাখিল কৰা মূল গোচৰত ৰাজ্যখনে ৰাষ্ট্ৰীয় চিকিৎসা আয়োগ আইন, ২০১৯ ৰ ধাৰা ১৪, ভাৰতীয় ঔষধ প্ৰণালী আইন, ২০২০ আৰু ৰাষ্ট্ৰীয় হোমিঅ’পেথি আয়োগ আইন, ২০২০, স্নাতকোত্তৰ চিকিৎসা শিক্ষা নিয়মাৱলী, ২০০০, নিয়মাৱলী ৯ আৰু ৯ এ,  বিডিএছ পাঠ্যক্ৰম নিয়মাৱলী, ২০০৭-ৰ নিয়মাৱলী ১(২)ৰ ১(৫) আৰু ২য়ে সমতাৰ মৌলিক অধিকাৰ আগবঢ়োৱা সংবিধানৰ অনুচ্ছেদ ১৪ উলংঘা কৰা বুলি ঘোষণা কৰাৰ আৰ্জি জনাইছিল।

গোচৰটোত ৰাজ্যখনে যুক্তি দিছে যে NEET “ফেডাৰেল গাঁথনি”ৰ উলংঘাকাৰী কিয়নো ই ৰাজ্যসমূহক চিকিৎসা মহাবিদ্যালয়ৰ চৰকাৰী আসনত শিক্ষাৰ্থীসকলক ভৰ্তি কৰাৰ ক্ষমতাৰ পৰা বঞ্চিত কৰিছে। এই সন্দৰ্ভত NEETক “স্বেচ্ছাচাৰী” বুলি  যুক্তি দাঙি ধৰি তামিলনাডু চৰকাৰে কয় যে পৰীক্ষাটোৱে ৰাজ্যখনৰ শিক্ষাৰ্থীসকলৰ ওপৰত বিৰূপ প্ৰভাৱ পেলাইছে আৰু গ্ৰাম্য অঞ্চলৰ শিক্ষাৰ্থীসকলক অসুবিধাত পেলাইছে।

গোচৰটোত যুক্তি দিয়া হৈছে, “যিহেতু NEET চিবিএছই পাঠ্যক্ৰম আৰু পৰীক্ষাৰ পদ্ধতিৰ ওপৰত আধাৰিত, ই পৰোক্ষভাৱে তামিলনাডু ৰাজ্যৰ বিদ্যালয় আৰু শিক্ষাৰ্থীসকলক চিবিএছই/এনচিইআৰটি বোৰ্ড বাছনি কৰিবলৈ বাধ্য কৰিব যি ফেডাৰেল গাঁথনিৰ উলংঘন।”

উল্লেখ্য যে উচ্চতম ন্যায়ালয়ে ২০২০ চনত খ্ৰীষ্টান মেডিকেল কলেজ, ভেলোৰ বনাম ইউনিয়ন অৱ ইণ্ডিয়া গোচৰত NEETৰ বৈধতা বজাই ৰাখিছিল। ২০২১ চনত, ডিএমকে চৰকাৰে তামিলনাডু বিধানসভাত চৰকাৰী চিকিৎসা মহাবিদ্যালয়সমূহক NEET ৰ পৰা ৰেহাই দিয়া এখন বিধেয়ক গৃহীত কৰে। অৱশ্যে, বিধেয়কখন এতিয়াও ৰাষ্ট্ৰপতিৰ সন্মতিৰ বাবে অপেক্ষা কৰি আছে।