কৰ্দক এটেক গুৱাহাটী উচ্চ ন্যায়ালয়ৰ ন্যায়াধীশ হিচাপে নিযুক্তি: প্ৰথমগৰাকী অৰুণাচলী ন্যায়াধীশত পৰিণত এটে

অৰুণাচল প্ৰদেশৰ জেষ্ঠ অধিবক্তা কৰ্দক এটেক গুৱাহাটী উচ্চ ন্যায়ালয়ৰ ন্যায়াধীশ হিচাপে নিযুক্তি দিয়াৰ পৰামৰ্শ আগবঢ়াইছে উচ্চতম ন্যায়ালয়ৰ কলেজিয়ামে। এইদৰে উচ্চ ন্যায়ালয়ৰ ন্যায়াধীশ পদত উপৱিষ্ট হোৱা অৰুণাচল প্ৰদেশৰ প্ৰথমগৰাকী অধিবক্তাৰ কৃতিত্ব লাভ কৰিব এটেই।

অৰুণাচল প্ৰদেশৰ অতিৰিক্ত মহাধিবক্তা হিচাপে কাৰ্যনিৰ্বাহ কৰা জ্যেষ্ঠ অধিবক্তাগৰাকীক গুৱাহাটী উচ্চ ন্যায়ালয়ৰ ন্যায়াধীশ হিচাপে নিযুক্তিৰ বাবে মুখ্য ন্যায়াধীশ ডি ৱাই চন্দ্ৰচুড়ৰ নেতৃত্বৰ তথা ন্যায়াধীশ সঞ্জয় কিষাণ কৌল আৰু কে এম জোচেফকে ধৰি কলেজিয়ামে বিগত বৰ্ষত ১ ডিচেম্বৰত সৰ্বসন্মতিক্ৰমে পৰামৰ্শ আগবঢ়ায়।

অৰুণাচল প্ৰদেশৰ নাহৰলাগুনৰ বাসিন্দা, অনুসূচিত জনজাতি (এছ টি) মূলৰ এটেৰ নিযুক্তিৰ পৰামৰ্শত অসম, অৰুণাচল প্ৰদেশ, মিজোৰাম আৰু নাগালেণ্ডৰ মুখ্যমন্ত্ৰী আৰু ৰাজ্যপালসকল একমত হোৱা বুলি উল্লেখ কৰা হৈছে।

উচ্চতম ন্যায়ালয়ৰ কলেজিয়ামে এই সন্দৰ্ভত উল্লেখ কৰা মতে, উচ্চ ন্যায়ালয়লৈ উন্নীতকৰণৰ বাবে কাৰ্ডক এটেৰ যোগ্যতা আৰু উপযুক্ততা মূল্যায়নৰ উদ্দেশ্যে কলেজিয়ামে পূৰ্বৰ ৰেকৰ্ড তন্ন তন্নকৈ পৰীক্ষা কৰিছে।

চোৰাংচোৱা ব্যুৰোৰ প্ৰতিবেদনে এটেৰ ব্যক্তিগত আৰু পেছাদাৰী ভাবমূৰ্তি ভাল বুলি উল্লেখ কৰাৰ লগতে সততাৰ ক্ষেত্ৰত তেওঁৰ কোনো ঋণাত্মক ৰেকৰ্ড নাই বুলিও নিশ্চিত কৰাৰ কথা উচ্চতম ন্যায়ালয়ৰ কলেজিয়ামে সদৰী কৰিছে।