জম্মু-কাশ্মীৰত সন্ত্ৰাসবাদীৰে সংঘৰ্ষ: পাঁচজনলৈ বৃদ্ধি নিহত সেনা জোৱানৰ সংখ্যা

জম্মু-কাশ্মীৰৰ ৰাজৌৰী জিলাত আজি পুৱাৰ ভাগত সন্ত্ৰাসবাদীৰ সৈতে হোৱা ভয়াৱহ সংঘৰ্ষত নিহত সেনা জোৱানৰ সংখ্যা ৫ গৰাকীলৈ বৃদ্ধি হৈছে। লগতে এই সংঘৰ্ষত আহত আন এগৰাকী জোৱান চিকিৎসাধীন হৈ আছে।

ইফালে সংঘৰ্ষত লিপ্ত হোৱা সন্ত্ৰাসবাদী দলটোৰ সন্ধানত সেনাই অভিযান অব্যাহত ৰাখিছে বুলি সেনাৰ এগৰাকী বিষয়াই উল্লেখ কৰিছে। সেনাই সদৰী কৰা তথ্য অনুসৰি, সংঘৰ্ষত থিতাতে দুগৰাকী জোৱানৰ মৃত্যু হোৱাৰ বিপৰীতে চাৰিগৰাকী জোৱান আহত হৈছিল।

আহত জোৱান কেইগৰাকীক উধামমপুৰৰ কমাণ্ড হাস্পতাললৈ প্ৰেৰণ কৰা হৈছিল। কিন্তু আঘাত গুৰুতৰ হোৱাৰ পৰিণতিত ইয়াৰে তিনিগৰাকীৰ চিকিৎসালয়ত মৃত্যু হয়।

উল্লেখ্য যে, ৰাজৌৰী জিলাৰ কান্দি অঞ্চলৰ কেশৰী পাহাৰত এই সংঘৰ্ষৰ সূত্ৰপাত হৈছিল। এটা গুহাত লুকাই থকা সন্ত্ৰাসবাদীৰ দল এটাৰ উপস্থিতিৰ নিৰ্দিষ্ট তথ্য লাভ কৰা বুলি সেনাই ইতিমধ্যে জানিবলৈ দিছে।

সেনাৰ তথ্য অনুসৰি, যোৱা ২০ এপ্ৰিলত পুঞ্চ জিলাৰ ভাটা ধুৰিয়ানত সেনাৰ এখন ট্ৰাকত এম্বুছত জড়িত আছিল সন্ত্ৰাসবাদীৰ দলটো।

এই আক্ৰমণটোত পাঁচগৰাকী জোৱান নিহত হোৱাৰ লগতে সেনাৰ অস্ত্ৰ-শস্ত্ৰ লৈ সন্ত্ৰাসবাদী দলটোৱে পলায়ন কৰিছিল। ইয়াৰ পিছতে সন্ত্ৰাসবাদী দলটোৰ সন্ধানত ভাৰতীয় সেনাই চোৰাংচোৱা ভিত্তিক অভিযান চলাই আহিছে।

ইফালে আজিৰ সংঘৰ্ষৰ পিছতে কাষৰীয়া অঞ্চলৰ পৰা অতিৰিক্ত সৈন্যক সংঘৰ্ষস্থলীলৈ প্ৰেৰণ কৰা হৈছে বুলি সেনাৰ বিষয়া গৰাকীয়ে সদৰী কৰিছে।