অনুসূচিত জাতিৰ নামত সংৰক্ষিত সমষ্টি কৰ্তনক লৈ উত্তাল দেৰগাঁও

ভাৰতৰ নিৰ্বাচনৰ আয়োগৰ সমষ্টি পুনৰ নিৰ্ধাৰণ খচৰা প্ৰস্তুতত লৈ তীব্ৰ বাক-বিতণ্ডাৰ লগতে প্ৰতিবাদ অব্যাহত আছে ৰাজ্যৰ চৌদিশে। ঠায়ে-ঠায়ে বিভিন্ন দল-সংগঠনকে ধৰি সাধাৰণ জনতা তথা বিৰোধী দলৰ লগতে স্বয়ং শাসকীয় পক্ষৰ নেতা মন্ত্ৰীয়েও এই খচৰাৰ বিৰোধিতা কৰা পৰিলক্ষিত হৈছে।

মঙ্গলবাৰে দেৰগাঁও নাৰিকলগুৰিত অনুসূচিত জাতি ছাত্ৰ সন্থা গোলাঘাট জিলা সমিতিৰ নেতা-কৰ্মীয়ে ২ ঘন্টীয়া অৱস্থান ধৰ্মঘট কাৰ্যসূচী ৰূপায়ন কৰে।

৯৭ নং দেৰগাঁও বিধান সভা সমষ্টি সংৰক্ষণ ব্যৱস্থা কৰ্তন কৰা কাৰ্যৰ বিৰোধিতাৰে আৰু পূৰ্বৰ অনুসূচিত লোকৰ মৰ্যদা বাহাল ৰখাৰ দাবীত তীব্ৰ প্ৰতিবাদ সাব্যস্ত কৰে সংগঠনটোৱে। 

প্ৰতিবাদী কাৰ্যসূচীৰ জৰিয়তে মুখ্যমন্ত্ৰী হায়-হায়, দেৰগাঁও সমষ্টিৰ পূৰ্বৰ মৰ্যদা ঘূৰাই দিয়ক, সমষ্টি সংৰক্ষণ মুক্ত বন্ধ কৰক, উজনি অসমৰ পাঁচ লাখ লোকৰ ভৱিষ্যতে সুৰক্ষিত হোৱাকৈ দুটাকৈ সমষ্টি অনুসূচিত জাতি লোকৰ বাবে সংৰক্ষণ কৰক, নিৰ্বাচনী আয়োগ হায়-হায়,অশোক সিংহাল হায়-হায় আদি শ্ল’গানেৰে পৰিবেশ উত্তাল কৰি তোলে সংগঠনটোৱে।

ইফালে সংগঠনটোৰ দাবী সমূহ মানি ন’ললে আগন্তুক সময়ত তীব্ৰ গণতান্ত্ৰিক আন্দোলন গঢ়ি তোলাৰ হুংকাৰ প্ৰদান কৰে সংগঠনটোৰ নেতা-কৰ্মীয়ে।