উচ্চতম ন্যায়ালয়ে শাস্তিৰ স্থগিতাদেশ দিয়াৰ পিছত কি ক’লে ৰাহুল গান্ধীয়ে?

শুক্ৰবাৰে উচ্চতম ন্যায়ালয়ে মোদী উপাধিৰ মানহানিৰ গোচৰৰ শাস্তিৰ নিৰ্দেশ স্থগিত ৰাখে। 

উল্লেখ্য যে নিম্ন আদালতে মোডীৰ উপাধিৰ সম্পৰ্কত ‘অপমানজনক মন্তব্য’ৰ অভিযোগত ৰাহুল গান্ধীক ২ বছৰৰ কাৰাদণ্ড বিহিছিল। ইয়াৰ বাবেই তেওঁ সাংসদ পদ হেৰুৱাবলগীয়া হৈছিল। 

উচ্চতম ন্যায়ালয়ৰ স্থগিতাদেশৰ পিছত এই সন্দৰ্ভত গান্ধীয়ে এটা টুইট কৰে। অৱশ্যে তাত তেওঁ উৎসাহ প্ৰকাশ কৰা দেখা নগ’ল। বৰঞ্চ সেই টুইটত তেওঁ নিজৰ ভৱিষ্যতৰ পৰিকল্পনা স্পষ্ট কৰি দিয়ে ৰাহুল গান্ধীয়ে। 

আদালতৰ ৰায় সন্দৰ্ভত ৰাহুল গান্ধীয়ে কয়, ‘যি হওক, মোৰ কৰ্তব্য একেই থাকিব। ভাৰতৰ মতাদৰ্শ সুৰক্ষিত কৰিব লাগিব।”

আনহাতে, সংবাদমেলত উপস্থিত হৈ ৰাহুল গান্ধীয়ে কয়, মোৰ পথ স্পষ্ট। মই জানো মই কি কৰিব লাগিব। মোক সহায় কৰাৰ বাবে ধন্যবাদ।” 

উচ্চতম ন্যায়ালয়ত সকাহ পোৱাৰ পিছত মল্লিকাৰ্জুন খৰ্গেই কয়, ‘তেওঁ সত্যৰ বাবে যুঁজিছে। কাশ্মীৰৰ পৰা কন্যাকুমাৰীলৈ চাৰি হাজাৰ কিলোমিটাৰ খোজ কাঢ়ি মানুহৰ লগত মিলি গৈছে তেওঁ। তেওঁলোকৰ আশীৰ্বাদতেই এই সকাহ আহিল।”

২০১৯ চনৰ লোকসভা নিৰ্বাচনী প্ৰচাৰৰ সময়ত ৰাহুল গান্ধীয়ে ৰাজহুৱা সভাত মোদীৰ উপাধি সন্দৰ্ভত মন্তব্য কৰিছিল। এই মন্তব্যক লৈ গুজৰাটৰ চুৰাটৰ আদালতত গোচৰ ৰুজু কৰে এজন ব্যক্তিয়ে। সেই আবেদনতে ৰাহুল গান্ধীক দোষী সাব্যস্ত কৰা হৈছিল। এই ৰায়দানৰ পিছত ৰাহুলে লোকসভাৰ সদস্য হিচাপে পদ হেৰুৱাবলগীয়া হ’ল। গুজৰাট উচ্চ ন্যায়ালয়ত আবেদন কৰাৰ পিছতো কোনো সমাধান নোহোৱাত দেশৰ উচ্চতম ন্যায়ালয়ৰ কাষ চাপিছিল কংগ্ৰেছৰ সাংসদগৰাকীয়ে।