ভাতৃ মোদীক নিজ হাতে বান্ধিব ৰাখী: দিল্লীলৈ আহিব মোদীৰ পাকস্তানী ভগ্নী

অহা ৩০ আগষ্টত উদযাপন কৰা হ’ব ৰাখী বন্ধন। ভাতৃ-ভগ্নীৰ মাজত প্ৰেমৰ বন্ধন চিহ্নিত কৰা এই ৰাখী বন্ধন দেশৰ সৰ্ব প্ৰান্তত উদযাপন কৰা হয়। ৰাখী বন্ধনেৰে ভাতৃৰ প্ৰতি থকা প্ৰেম প্ৰকাশৰ বাবে ভাৰতলৈ আহিবলৈ সাজু হৈছে এগৰাকী পাকিস্তানী মহিলা।

মহিলাগৰাকীৰ নাম কামাৰ মহছিন শ্বেখ। এই পাকিস্তানী মহিলাগৰাকীৰ ভাতৃ হৈছে ভাৰতৰ প্ৰধানমন্ত্ৰী নৰেন্দ্ৰ মোদী। অৰ্থাৎ ভাতৃ নৰেন্দ্ৰ মোদীৰ হাতত ৰাখী বান্ধিবলৈ নতুন দিল্লী ভ্ৰমণ কৰিব কামাৰ মহছিন শ্বেখে।

অৱশ্যে পাকিস্তানী মূলৰ শ্বেখ বিবাহৰ পিছত আহমেদাবাদত বসতি কৰে। যোৱা ৩০ বছৰতকৈও অধিক সময় ধৰি মোদীক ৰাখী বান্ধি আহিছে বুলি জানিবলৈ দিছে মহিলাগৰাকীয়ে।

ক’ভিদৰ বাবে বিগত দুবছৰ তেওঁ মোদীৰ ওচৰলৈ যাব নোৱাৰিলে যদিও কিন্তু ঘৰতে বনোৱা ৰাখী ডাকযোগে পঠিয়াই পৰম্পৰা অব্যাহত ৰাখিছে শ্বেখে। যোৱা বছৰো তেওঁ মোদীলৈ ৰাখী প্ৰেৰণ কৰি ২০২৪ চনৰ সাধাৰণ নিৰ্বাচনৰ শুভেচ্ছা জনাইছিল।

এইবাৰ প্ৰধানমন্ত্ৰীক ব্যক্তিগতভাৱে সাক্ষাৎ কৰি একেলগে ৰাখী বন্ধন উৎসৱ উদযাপন কৰিব বুলি আশাবাদী শ্বেখ। লগতে তেওঁ মোদীৰ পঢ়াৰ প্ৰতি থকা ধাউতি বিবেচনা কৰি কৃষি বিষয়ক এখন কিতাপো উপহাৰ দিয়াৰ পৰিকল্পনা কৰিছে।

শ্বেখে উল্লেখ কৰা মতে, মোদীৰ সুস্বাস্থ্য আৰু দীৰ্ঘায়ুৰ বাবে তেওঁ প্ৰতিদিনে প্ৰাৰ্থনা কৰে। মোদীক লৈ কৰা তেওঁৰ সকলো ইচ্ছা পূৰণ হয় বুলিও তেওঁ বিশ্বাস কৰে। মোদী গুজৰাটৰ মুখ্যমন্ত্ৰী হ’বলৈ প্ৰাৰ্থনা কৰাৰ পিছতে এই প্ৰাৰ্থনা ফলিয়াইছিল বুলি তেওঁ দাবী কৰে।

কেৱল সিমানেই নহয়, ১৪ চনৰ নিৰ্বাচনৰ পূৰ্বে মোদীক ৰাখী বন্ধাৰ সময়ত শ্বেখে মোদী ভাৰতৰ প্ৰধানমন্ত্ৰী হোৱাৰ ইচ্ছা প্ৰকাশ কৰিছিল আৰু এই ইচ্ছাও পূৰণ হৈছিল বুলি দাবী কৰিছে মোদীৰ এই পাকিস্তানী ভগ্নীয়ে।