মণিপুৰ হিংসা: যোৱা ৬ জুলাইত নিৰুদ্দেশ হোৱা দুই মেইটেই শিক্ষাৰ্থীক ‘হত্যা’; ছ’চিয়েল মিডিয়াত ভাইৰেল ফটো

যোৱা ৬ জুলাইত ৰাজ্যখনত জনগোষ্ঠীয় হিংসাৰ চৰম পৰ্যায়ত নিৰুদ্দেশ হোৱা মণিপুৰৰ দুগৰাকী কিশোৰ শিক্ষাৰ্থীক ‘হত্যা’ কৰাৰ সন্দেহ কৰা হৈছে।

ৰাজ্যত ইণ্টাৰনেট সেৱা পুনৰ আৰম্ভ হোৱাৰ পিছতে নিৰুদ্দেশ হোৱা মণিপুৰৰ শিক্ষাৰ্থী দুজনৰ ছবি ছ’চিয়েল মিডিয়াত ভাইৰেল হৈ পৰিছে।

ভাইৰেল ফটো এখনত শিক্ষাৰ্থী দুজনৰ মৃতদেহ দেখা গৈছে, আনখনত পিছপিনে দুজন অস্ত্ৰধাৰী লোকৰ সৈতে আতংকত বহি থকা দেখা গৈছে।

ইফালে মণিপুৰ চৰকাৰে এই মৃতদেহ নিৰুদ্দেশ হোৱা শিক্ষাৰ্থী দুজনৰ বুলি নিশ্চিত কৰা বুলি জানিব পৰা গৈছে।

নিহত ছাত্ৰ-ছাত্ৰী দুগৰাকী হ’ল: ছাত্ৰী – হিজাম লিন্থোইংগাম্বী (১৭) আৰু ছাত্ৰ – ফিজাম হেমজিৎ (২০)।

মণিপুৰৰ মুখ্যমন্ত্রীৰ কার্যালয়ৰ তৰফৰ পৰা জানিব পৰা মতে, ইতিমধ্যে এই গোচৰৰ তদন্ত চেন্ট্ৰেল ব্যুৰো অফ ইনভেষ্টিগেশ্যনে (চিবিআই)অব্যাহত ৰাখিছে।

নিৰুদ্দেশ হোৱা, মৃত ছাত্ৰ-ছাত্ৰী দুয়োজনেই আছিল মণিপুৰৰ মেইটেই সম্প্ৰদায়ৰ।

ছ’চিয়েল মিডিয়াত ভাইৰেল হোৱা ফটোবোৰত দেখুওৱা টাইমলাইন অনুসৰি ছবিবোৰ নিৰুদ্দেশ হোৱাৰ দুদিন পিছত ৮ জুলাইত লোৱা হৈছে।

লুৱাংবিয়ে নিজৰ কোচিং ক্লাছত অংশগ্ৰহণ কৰাৰ পিছত ৬ জুলাইত হিজামৰ সৈতে কেটিএম বাইকত উঠি ওলাই গৈছিল যদিও তেতিয়াৰ পৰা আৰু ঘৰলৈ উভতি অহা নাই।