বিশ্বকাপৰ ফাইনেলত ভাৰতৰ পৰাজয় ক্ৰিকেটৰ বাবেই মংগলজনক!

যোৱা দেওবাৰে অন্ত পৰিল এদিনীয়া ক্ৰিকেট বিশ্বকাপৰ। সমগ্ৰ প্ৰতিযোগিতাখনত দুৰন্ত প্ৰদৰ্শনেৰে অপৰাজেয় হৈ ৰোৱা ভাৰতে ফাইনেলত হতাশাজনক প্ৰদৰ্শনেৰে অষ্ট্ৰেলিয়াৰ বিপক্ষে পৰাজয় স্বীকাৰ কৰিবলগা হ’ল।

ভাৰতৰ এই পৰাজয়ক কেন্দ্ৰ কৰি নানা ক্ৰিয়া-প্ৰতিক্ৰিয়াৰ সৃষ্টি হৈছে। তাৰ মাজতে পাকিস্তানৰ প্ৰাক্তন ক্ৰিকেটাৰ আব্দুল ৰাজ্জাকে কৰিছে এক চাঞ্চল্যকৰ মন্তব্য। ৰাজ্জাকৰ মতে, ফাইনেলত ভাৰতৰ পৰাজয় ক্ৰিকেটৰ বাবেই মংগলজনক।

মূলত: আয়োজক দেশ হিচাপে ভাৰতে পিটছৰ ক্ষেত্ৰত অধিক পক্ষপাতদুষ্ট আচৰণ কৰাৰ বাবে ভাৰত ফাইনেলত জয়ী হোৱাৰ যোগ্য নাছিল বুলি মন্তব্য কৰিছে ৰাজ্জাকে। ৰাজ্জাকৰ দাবী, এতিয়া ক্ৰিকেট জয়ী হৈছে আৰু ভাৰত পৰাস্ত হৈছে।

বিশ্বকাপত ভাৰত জয়ী হোৱা হ’লে ক্ৰিকেটৰ বাবে ই এক অতি দুৰ্ভাগ্যজনক মুহূৰ্ত হ’লহেঁতেন বুলি দাবী কৰে প্ৰাক্তন ক্ৰিকেটাৰগৰাকীয়ে। তেওঁৰ মতে, ভাৰতে আয়োজক হোৱাৰ সুযোগ নিজৰ সুবিধাৰ বাবে ব্যৱহাৰ কৰিছিল।

কেতিয়াও কোনো আইচিচি ফাইনেলৰ বাবে ইমান বেয়া পিটচ দেখা নাই বুলিও ৰাজ্জাকে মন্তব্য কৰে। তেওঁৰ যুক্তি, পিটচ সদায় যোগ্য হ’ব লাগে আৰু ন্যায্য পৰিৱেশ হ’ব লাগে তথা দুয়োটা দলৰ ভাৰসাম্য থাকিব লাগে।

উল্লেখ্য যে, শেহতীয়াকৈ এক টেলিভিছন শ্ব’ত বলীউডৰ মোহময়ী অভিনেত্ৰী ঐশ্বৰ্য ৰায় সন্দৰ্ভত আন এক বিতৰ্কিত মন্তব্য কৰিছিল প্ৰাক্তন ক্ৰিকেটাৰগৰাকীয়ে। এই মন্তব্যক লৈ সৃষ্টি হোৱা বিতৰ্কৰ পিছতে ক্ষমাও খুজিছিল ৰাজ্জাকে।