চোৰাংচিকাৰী প্ৰতিৰোধ শিবিৰৰ কাষতে পুনৰ চোৰাংচিকাৰীয়ে গঁড় হত্যা কৰি কাটি লৈ গ’ল খড়গ

নগাঁও জিলাৰ জখলাবন্ধা আৰক্ষী চকীৰ অন্তৰ্গত তথা কাজিৰঙা ৰাষ্ট্ৰীয় উদ্যানৰ বুঢ়াপাহাৰত আজি পুনৰ চোৰাংচিকাৰীয়ে গঁড় হত্যা কৰে।

বন বিভাগৰ এজন বিষয়াই জনোৱা অনুসৰি ৰাষ্ট্ৰীয় উদ্যানখনৰ ব্ৰহ্মপুত্ৰৰ পাৰত থকা চিৰাখোৱা চোৰাংচিকাৰী প্ৰতিৰোধ শিবিৰৰ কাষৰ পৰাই চোৰাংচিকাৰীয়ে আজি পুৱা এটা প্ৰাপ্ত বয়স্ক গঁড় হত্যা কৰি খড়গ কাটি নিয়ে।

বিভাগীয় বন বিষয়া ৰোহিনী শইকীয়া কয় যে চোৰাংচিকাৰীয়ে হত্যা কৰি খড়গ কাটি নিয়া গঁড়টো প্ৰায় ৩০ বছৰ বয়সৰ হ’ব আৰু গঁড়টোক চোৰাংচিকাৰীয়ে এই প্ৰাপ্ত বয়স্ক গঁড়টোক কেইবাজাঁইও গুলী মাৰি হত্যা কৰে। শইকীয়াই জনোৱা অনুসৰি ঘটনাস্থলীৰ পৰা এ কে ৰাইফলছৰ প্ৰায় ২৪ টা খালী কাৰ্টিজ তেওঁলোকে উদ্ধাৰ কৰে।

লগতে শইকীয়াই কয় যে ঘটনা সংঘটিত অঞ্চলটো ব্ৰহ্মপুত্ৰৰ কাষৰ মুকলি ঠাই হোৱাৰ বাবে চোৰাংচিকাৰী বাবে গঁড় মাৰি এই স্থানৰ পৰা পলোৱাৰ বাবে সহজ হয়। বৰ্তমান তেওঁলোকে চোৰাংচিকাৰীৰৰ সন্ধানত অঞ্চলটোত স্নিফাৰ ডগৰ সহায় লৈছে বুলি শইকীয়াই কয়।

বৰ্তমান ৰাষ্ট্ৰীয় উদ্যানখনত ইস্পচিয়েল টাস্ক ফ’ৰ্চ, আৰক্ষী আৰু বন বিষয়াই যৌথভাৱে চোৰাংচিকাৰীৰৰ সন্ধানত অনুসন্ধান চলাই থকা বুলিও বন বিষয়া শইকীয়াই জানিবলৈ দিয়ে।

উল্লেখোগ্য যে চাৰিদনি পূৰ্বে নতুন বন মন্ত্ৰী পৰিমল শুক্লবৈদ্যই নিজে গাড়ী চলাই কাজিৰঙা ভ্ৰমণ কৰি যোৱাৰ পিছতে চোৰাংচিকাৰীয়ে গঁড় হত্যা কৰি খড়গ কাটি নিলে। ফলত বন মন্ত্ৰী গৰাকীয়ে ৰাষ্ট্ৰীয় উদ্যানখনৰ এশিঙীয়া গঁড় ৰক্ষা কৰাৰ ক্ষেত্ৰত কেনেধৰণৰ ব্যৱস্থা গ্ৰহণ কৰে সেয়া লক্ষণীয় হ’ব।