“দিল্লী বনেগা খালিস্তান” : সংসদ ভৱনত আক্ৰমণ কৰাৰ ভাবুকি খালিস্তানী গুৰপতৱন্ত সিং পান্নুনৰ

ভাৰতত পুনৰ আক্ৰমণৰ ভাবুকি দিছে খালিস্তানী সন্ত্ৰাসবাদীয়ে। এয়াৰ ইণ্ডিয়াৰ বিমানত আক্ৰমণ কৰাৰ ভাবুকি দিয়াৰ পাছত এইবাৰ খালিস্তানী উগ্ৰপন্থী গুৰপতৱন্ত সিং পান্নুনে সংসদত আক্ৰমণৰ ভাবুকি দিছে। 

ভিডিঅ’ বাৰ্তাযোগে পান্নুনে ১৩ ডিচেম্বৰৰ পূৰ্বে বা ১৩ ডিচেম্বৰত ভাৰতৰ সংসদ ভৱনত আক্ৰমণ কৰাৰ ভাবুকি দিয়ে। 

পান্নুনে দাবী কৰে যে তেওঁক হত্যা কৰাৰ পৰিকল্পনা আছিল। সেই প্ৰচেষ্টা বিফল হ’ল। প্ৰতিশোধ ল’বলৈ খালিস্তানী সংগঠনে ১৩ ডিচেম্বৰৰ পূৰ্বে বা সেইদিনা সংসদত আক্ৰমণ চলাব। 

প্ৰসংগক্ৰমে ২০০১ চনৰ আজিৰ দিনটোতে সংসদত সন্ত্ৰাসবাদী আক্ৰমণ সংঘটিত হৈছিল।

আমেৰিকা যুক্তৰাষ্ট্ৰৰ খালিস্তানী সংগঠন শিখছ ফৰ জাষ্টিছৰ মুৰব্বী গুৰপতৱন্ত সিং পান্নুনে এটা ভিডিঅ’ পোষ্ট কৰে। ভিডিঅ’টোত ২০০১ চনৰ সংসদ ভৱন আক্ৰমণৰ প্ৰধান অভিযুক্ত আফজল গুৰুৰ ফটো দেখুওৱা হৈছে। 

ভিডিঅ’টোৰ কেপচনত লিখা আছে, “দিল্লী বনেগা খালিস্তান”। সেই ভিডিঅ’টোত পান্নুনে দাবী কৰিছে যে এতিয়া প্ৰতিশোধৰ সময়। ভাৰতীয় চোৰাংচোৱাই তেওঁক হত্যা কৰাৰ চেষ্টাৰ প্ৰতিশোধ ল’বলৈ অহা ১৩ ডিচেম্বৰত বা তাৰ আগতে ভাৰতীয় সংসদত আক্ৰমণ সংঘটিত হ’ব।

উল্লেখ্য যে কিছু মাহ পূৰ্বে পান্নুনে এয়াৰ ইণ্ডিয়াৰ এখন বিমান আক্ৰমণ কৰাৰ ভাবুকি দিছিল।

আনহাতে, আমেৰিকাইও যোৱা মাহত দাবী কৰিছিল যে পান্নুনক হত্যাৰ চেষ্টা ব্যৰ্থ হৈছে। এই সন্দৰ্ভত ভাৰত চৰকাৰকো জাননী দিছে আমেৰিকাই। বিষয়টো ভাৰতে চিন্তনীয় বুলি উল্লেখ কৰিছে। এই ঘটনাৰ তদন্তও আৰম্ভ হৈছে।