মৰ্মান্তিক! নিশা জুবিন গাৰ্গৰ সংগীতানুষ্ঠানলৈ অহাৰ পথত দুৰ্ঘটনাত নিহত ৫ জন

মঙলবাৰে নিশা শোণিতপুৰৰ বালিপৰাৰ বিভিন্ন স্থানত কেইবাটাও পথ দুৰ্ঘটনা সংঘটিত হয়। এই দুৰ্ঘটনাত মুঠ ৫ জনকৈ যুৱকৰ মৃত্যু হয়।

জানিব পৰা মতে, মঙ্গলবাৰে নিশা বালিপৰাত জুবিন গাৰ্গৰ সংগীতানুষ্ঠান অনুষ্ঠিত হৈছিল। বালিপৰা মজলীয়া বিদ্যালয়ৰ শতবৰ্ষৰ অনুষ্ঠান উপলক্ষে অনুষ্ঠিত হৈছিল জুবিনৰ এই সংগীতানুষ্ঠান।

সংগীতানুষ্ঠান উপভোগ কৰিবলৈ অহাৰ পথতে দুৰ্ঘটনা সংঘটিত হয়। দুৰ্ঘটনাত নিহতসকলক ক্ৰমে, কাচেম আলী, ৰাজ ইছলাম, বিপুল দাস, দেৱজিৎ বসুমতাৰী, চৰফুং বসুমতাৰী বুলি চিনাক্ত কৰা হৈছে।

ইয়াৰ ভিতৰত নিহত কাচেম আলী আৰু ৰাজ ইছলামৰ ঘৰ গুদামঘাটত, দেৱজিৎ বসুমতাৰীৰ ঘৰ দক্ষিণ আমলগাত, চৰফুং বসুমতাৰীৰ ঘৰ কটন মিলত আৰু বিপুল দাসৰ ঘৰ ঢেকেৰীগাঁৱত বুলি জানিব পৰা গৈছে।

দুৰ্ঘটনাত নিহতসকলৰ মৃতদেহ মৰণোত্তৰ পৰীক্ষাৰ বাবে তেজপুৰ চিকিৎসা মহাবিদ্যালয় হাস্পাতাললৈ প্ৰেৰণ কৰা হৈছে।

নিশা সংঘটিত হোৱা এই মৰ্মান্তিক দুৰ্ঘটনাত ৫ জনকৈ যুৱকৰ মৃত্যুত অঞ্চলটোত শোকৰ ছাঁ পৰিছে।