চাঞ্চল্য! ছয় নাপিতক অপহৰণ কৰি প্ৰাণ ল’লে অচিনাক্ত উগ্ৰপন্থীয়ে

এক চাঞ্চল্যকৰ কাণ্ডই জোকাৰি গৈছে পাকিস্তান। দেশখনৰ পঞ্জাৱ প্ৰদেশৰ ছয়জন নাপিত চিকাৰ হৈছে অচিনাক্ত উগ্ৰপন্থীৰ নৃশংসতাৰ।

আৰক্ষীয়ে সদৰী কৰা মতে, অচিনাক্ত উগ্ৰপন্থীয়ে পাকিস্তানৰ পঞ্জাৱ প্ৰদেশৰ ছয়জন নাপিতক অশান্ত উত্তৰ-পশ্চিম অঞ্চলৰ পৰা অপহৰণ কৰি গুলীয়াই হত্যা কৰে।

আফগানিস্তানৰ সীমান্তৱৰ্তী খাইবাৰ পাখতুনখোৱা প্ৰদেশৰ উত্তৰ ৱাজিৰিষ্টান জিলাৰ মিৰ আলী অঞ্চলত সংঘটিত হৈছে এই ঘটনা।

পঞ্জাৱ প্ৰদেশৰ পৰা আহি স্থানীয় বজাৰখনত নাপিতৰ দোকান চলাইছিল এই লোককেইজনে।

সোমবাৰে এই নাপিত ছয়জনক অচিনাক্ত উগ্ৰপন্থীয়ে অপহৰণ কৰি নিয়াৰ পিছত আজি তেওঁলোকৰ মৃতদেহ উদ্ধাৰ কৰা হয়।

এইপৰ্যন্ত কোনো গোটে এই হত্যাকাণ্ডৰ দায়িত্ব স্বীকাৰ কৰা নাই। ঘটনা সন্দৰ্ভত অভিযান আৰম্ভ কৰিছে আৰক্ষীয়ে।

উল্লেখ্য যে শেহতীয়াকৈ একেখন প্ৰদেশতে পাঁচজন শ্ৰমিকক তম্বুত থকাৰ সময়তে অচিনাক্ত উগ্ৰপন্থীয়ে গুলীয়াই হত্যা কৰিছিল।