চালকৰ প্রতিবাদলৈ পূৰ্ণ সমৰ্থন ৰাইজৰ দলৰঃ চালক বিৰোধী আইন প্ৰত্যাহাৰৰ দাবী

কেন্দ্রীয় চৰকাৰৰ ভাৰতীয় ন্যায় সংহিতাৰ হিট এণ্ড ৰান গোচৰৰ শাস্তিৰ বিৰোধিতাৰে চালক সকলে গ্ৰহণ কৰা যান-বাহনৰ চলাচল বন্ধৰ ধৰ্মগত কাৰ্যসূচীলৈ পূৰ্ণ সমৰ্থন আগবঢ়াইছে ৰাইজৰ দলে।

সংবাদ মাধমলৈ প্ৰেৰণ কৰা এক বিবৃত্তি যোগে ৰাইজৰ দলৰ সভাপতি তথা বিধায়ক অখিল গগৈয়ে চালক বিৰোধী এই বিতৰ্কিত আইন অতিশীঘ্ৰে প্ৰত্যাহাৰ কৰিব লাগে বুলি দাবী জনায়।

এজন গাড়ী চালকে দুৰ্ভাগ্যবশতঃও যদি কাৰোবাক খুন্দিয়াই তেন্তে সেই চালক জনে ১০লাখ টকা জৰিমনা কেনেকৈ ভৰিব তথা গাড়ী চালক এজনৰ বাবে ১০লাখ টকাৰ জৰিমনা সম্ভৱ নেকি বুলি প্ৰশ্ন কৰে অখিল গগৈয়ে।

কেৱল মাত্ৰ জৰিমনা সংগ্ৰহৰ স্বাৰ্থত এই আইন গাড়ীৰ চালক সকলৰ ওপৰত জাপি দিব খোজা হৈছে বুলি উল্লেখ কৰি তেওঁ লগতে এনেকুৱা এখন বিতৰ্কিত ক’লা আইন প্রত্যাহাৰ কৰিব লাগে বুলি দাবী কৰে।

অন্যথা চালক সকলৰ দাবী সমূহ মানি লৈ আইনত সংশোধনীৰ ব্যৱস্থা কৰিব লাগে বুলিও দোহাৰে বিধায়কগৰাকীয়ে। তেওঁ লগতে এই প্ৰসংগত সাংসদ নিলম্বনৰ দিশটোও আঙুলিয়াই দিয়ে।

ইতিহাস ৰচনা কৰি দেশৰ সংসদৰ পৰা ১৪৩ জনতকৈ বেছি সাংসদক বহিস্কাৰ কৰি এনে বিতৰ্কিত আইন জনতাৰ ওপৰত জাপি দিয়াটো কিমান দূৰ গ্ৰহণযোগ্য বুলি অখিল গগৈয়ে প্ৰশ্ন কৰে।

গগৈৰ অভিযোগ, “আজি দেশৰ জনতাই বিজেপি চৰকাৰৰ ভুল আৰু হঠকাৰী সিদ্ধান্তৰ ফল ভুগিব লগা হৈছে। ঠায়ে ঠায়ে পেট্ৰ’ল,ডিজেলকে ধৰি অত্যাৱশ্যকীয় খাদ্য সামগ্ৰীৰ নাটনিয়ে দেখা দিছে।

কেৱল মাত্ৰ বিজেপি চৰকাৰৰ ভুল সিদ্ধান্তৰ কাৰণেই ৰাজ্যৰ বিভিন্ন ঠাইত বিক্ষিপ্ত ঘটনা সংঘটিত হৈছে বুলি দাবী কৰি তেওঁ লগতে জনতা চৰকাৰৰ হঠকাৰী সিদ্ধান্তৰ বিৰুদ্ধে বাৰে বাৰে ৰাজপথত নামিবলৈ বাধ্য হয় বুলি মন্তব্য কৰে।

ৰাইজৰ দলে চালক সকলৰ এই প্রতিবাদলৈ পূৰ্ণ সমৰ্থন জনোৱাৰ লগতে ৪৮ ঘন্টীয়া চকা বন্ধ কাৰ্যসূচীলৈ পূৰ্ণ সমৰ্থন আগবঢ়াই বুলি জানিবলৈ দিয়ে।

অনাগত দিনটো চৰকাৰৰে এই বিতৰ্কিত ক’লা আইন বাতিল নকৰা পৰ্যন্ত চালক সকলৰ প্ৰতিবাদ আৰু দাবীৰ প্রতি সমৰ্থন জনাই যাব বুলিও ৰাইজৰ দলে উল্লেখ কৰে।