ভংগ হ’ল ঋষভ পন্থৰ বিশ্ব অভিলেখ; বিশ্বকাপত ১৩ বলতে অৰ্দ্ধশতক কৰা কোন এই বেটছমেন?

ঋষভ পন্থে আঠ বছৰ পূৰ্বে গঢ়িছিল এই বিশ্ব অভিলেখ। ১৯ বছৰ অনুৰ্ধ বিশ্বকাপৰ ইতিহাসত আটাইতকৈ কম বলত অৰ্ধশতক অৰ্জন কৰিছিল। সেই অভিলেখ এইবাৰ ভংগ হ’ল। চলিত ১৯ বছৰ অনুৰ্ধ বিশ্বকাপত দক্ষিণ আফ্ৰিকাৰ বেটছমেন ষ্টিভ ষ্ট’কে মাত্ৰ ১৩টা বলতে অৰ্ধশতক অৰ্জন কৰে। সেইদৰে, তেওঁ নতুন বিশ্ব অভিলেখ গঢ়িলে।

স্কটলেণ্ডৰ বিৰুদ্ধে ১৩টা বলত ৫০ ৰান সংগ্ৰহ কৰে ষ্ট’কে। ২৭০ ৰানৰ লক্ষ্য অনুসৰণ কৰি অ’পেনাৰ ষ্ট’কে আৰম্ভণিৰে পৰাই আক্ৰমণাত্মক বেটিং আৰম্ভ কৰে। তেওঁ স্কটলেণ্ডৰ স্পিনাৰ কাছিম খানক এটা অভাৰত ৫টা ছয় আৰু এটা চাৰি মাৰে। প্ৰথম চাৰিটা বলত ষ্ট’কে চাৰিটা ছয় মাৰে। পঞ্চম বলটোত চাৰি মাৰে। শেষৰ বলটোত তেওঁ আকৌ ছয় মাৰে।

১৩টা বলত ৫০ ৰান সংগ্ৰহ কৰাৰ পাছত ষ্ট’কৰ ৰানৰ হাৰ কিছু হ্ৰাস পায়। শেষলৈকে তেওঁ ৩৭টা বলত ৮৬ ৰানৰ ইনিংছ খেলে। ষ্ট’কৰ বেটেৰে দক্ষিণ আফ্ৰিকাই সহজ জয় লাভ কৰে। মাত্ৰ ২৭ অভাৰতে নিৰ্দ্ধাৰিত ৰান অতিক্ৰম কৰে।

লগতে পঢ়কঃ হায়দৰাবাদত দৰ্পচূৰ্ণ ৰোহিত বাহিনীৰঃ হাৰ্টলীৰ স্পিন ঘূৰ্ণীয়ে ইংলেণ্ডক দিলে আকাংক্ষিত জয়

ইয়াৰ পূৰ্বে এই বিশ্ব অভিলেখ আছিল ঋষভ পন্থৰ হাতত। ২০১৬ চনত মিৰপুৰত নেপালৰ বিৰুদ্ধে মাত্ৰ ১৮টা বলত পন্থে অৰ্দ্ধশতক অৰ্জন কৰিছিল। তেওঁ ২৪টা বলত ৭৮ ৰানৰ ইনিংছ খেলিছিল। সেই ইনিংছটোত বাওঁহতীয়া বেটছমেনগৰাকীয়ে ৯টা চাৰি আৰু ৫টা ছয় মাৰে। সেই অভিলেখ আঠ বছৰ ধৰি অক্ষুন্ন হৈ আছিল। এইবাৰ সেয়া ভাঙি গ’ল।