আজি চিলাৰায় দিৱস: ৰাজ্যৰ বিভিন্ন স্থানত মহাবীৰগৰাকীলৈ শ্ৰদ্ধাঞ্জলি জনাইছে অসমবাসীয়ে

অসম বুৰঞ্জীৰ এগৰাকী মহানায়ক তথা মহাবীৰ চিলাৰায়ৰ আজি ৫১৪ সংখ্যক জন্ম জয়ন্তী। এই উপলক্ষে আজি ৰাজ্যখনৰ বিভিন্ন ঠাইত মহাবীৰগৰাকীক শ্ৰদ্ধাৰে সুঁৱৰিবলৈ বৰ্ণাঢ্য কাৰ্য্যসূচী গ্ৰহণ কৰা হৈছে।

অতীতৰ কোচ ৰাজ্যৰ সেনাপতি তথা কোচ ৰজা নৰনাৰায়ণৰ ভাতৃ চিলাৰায় এগৰাকী সুদক্ষ যোদ্ধা আছিল। তেওঁ কেইবাখনো ডাঙৰ ৰণত জয় লাভ কৰি কোচ ৰাজ্যৰ পৰিসীমা বৃদ্ধি কৰিছিল। তেওঁৰ নেতৃতত্বতে কোচসকলে শক্তিশালী আহোম সেনাকো পৰাভূত কৰিছিল।

চিলাৰায়ৰ প্ৰকৃত নাম আছিল শুক্লধ্বজ। তেওঁৰ পিতৃ ষোল্লশ শতিকাৰ কোচ ৰাজ্যৰ প্ৰতিষ্ঠাপক বিশ্বসিংহ, মাতৃ পদ্মাৱতী আৰু ভ্ৰাতৃ ৰজা নৰনাৰায়ণ। তেওঁ নৰনাৰায়ণৰ সুদক্ষ সেনাপতি আছিল। তেওঁ চিলাৰ দৰে চোঁ মাৰি ৰণ কৰিছিল, সেয়ে তেওঁক চিলাৰায় বুলিও জনা যায়। চিলাৰায়ে দেৱান বা মন্ত্ৰীৰ কামো কৰিছিল, সেই কাৰণে তেওঁক চিলাৰায় দেৱানো বুলিও কোৱা হৈছিল। 

চিলাৰায়ে পণ্ডিতসকলক বিশেষ আদৰ কৰিছিল। চিলাৰায়ৰ সহায়তেই শংকৰদেৱে কামৰূপৰ পশ্চিম খণ্ডত বৈষ্ণৱ ধৰ্ম প্ৰচাৰ কৰিছিল। চিলাৰায় শিৱ ভক্ত আছিল যদিও পিছত শংকৰদেৱৰ প্ৰচাৰিত বৈষ্ণৱ ধৰ্মত আকৰ্ষিত হয়। শংকৰদেৱৰ গুণ-গৰিমাত চিলাৰায় মোহিত হৈ সপৰিবাৰে বৈষ্ণৱ ধৰ্ম গ্ৰহণ কৰে।

উল্লেখ্য যে কামাখ্য মন্দিৰৰ সৈতেও কোচ ৰজা নৰনাৰায়ণ আৰু চিলাৰায়ৰ স্মৃতি বিজড়িত হৈ আছে। কোচ ৰজা নৰনাৰায়ণেই ভগ্ন অৱস্থাত থকা কামাখ্য মন্দিৰ পুনৰ নিৰ্মাণ কৰাইছিল।

বর্তমান এই বীৰজনাক শ্ৰদ্ধা জনাই বীৰ চিলাৰায় বঁটা প্ৰদান কৰা হয়। বীৰ চিলাৰায়ৰ স্মৰণত, ২০০৫ চনৰে পৰা অসম চৰকাৰে তেওঁৰ জন্ম দিনটো বীৰ চিলাৰায় দিৱস হিচাপে উদযাপন কৰিব বুলি আনুষ্ঠানিকভাৱে ঘোষণা কৰে।