বড়োলেণ্ড বিশ্ববিদ্যালয়ত মুছলমানক অপমান: এ আই ইউ ডি এফৰ তীব্ৰ প্ৰতিক্ৰিয়া

কোকৰাঝাৰস্থিত বড়োলেণ্ড বিশ্ববিদ্যালয়ৰ উদ্যোগত আয়োজিত এক সাংস্কৃতিক শোভাযাত্ৰাত উদ্দেশ্য প্ৰণোদিত ভাবে সমগ্ৰ মুছলমান জাতিটোক অপৰাধী বুলি চিহ্নিত কৰি মুছলমান লোকক উপহাস কৰাক তীব্ৰ নিন্দা কৰিছে সৰ্ব ভাৰতীয় সংযুক্ত গণতান্ত্ৰিক মৰ্চাই।

কোকৰাঝাৰ বিশ্ববিদ্যালয়ৰ ২৩ সংখ্যক ‘বিশ্ববিদ্যালয় সপ্তাহত ১৬ মাৰ্চ তাৰিখে অর্থাৎ ৰমজানৰ পঞ্চম দিনা থুলুংগা উৎসৱ উপলক্ষে ইতিহাস বিভাগে “বড়ো কিংবদন্তি নায়ক” শীৰ্ষক বিষয়বস্তুৰ ওপৰত আয়োজন কৰা শোভাযাত্ৰাত মুছলমানৰ বেশত অভিনয় কৰা দুই যুৱকক অপৰাধী সজাই আৰক্ষীৰ দ্বাৰা প্ৰহাৰ কৰা দেখুৱায়। এই অভিনয়ৰ পৰা সমগ্ৰ মুছলমান জাতিটোক অপৰাধী সজোৱাৰ প্ৰৱণতাক অতি নিন্দনীয় বুলি দাবী কৰিছে এ আই ইউ ডি এফে।

লগতে পঢ়কঃ ৰোজাৰ সময়ত শৰীৰটো ভালে ৰাখিবলৈ মনত ৰাখক এই কেইটা কথা

এ আই ইউ ডি এফৰ হৈ দলৰ আই টি ছেলৰ অধ্যক্ষ তথা বিধায়ক আশ্ৰাফুল হুছেইনে উপাচাৰ্য লাইশ্ৰম লাডু সিং তথা বিশ্ববিদ্যালয়ৰ কৰ্তৃপক্ষলৈ প্ৰশ্ন তোলে যে এখন অগ্ৰণী শিক্ষানুষ্ঠানত এনে ধৰ্মীয় সাম্প্ৰদায়িক বিষবাষ্প বিয়পাই তুলিব পৰা পৰিবেশ কিদৰে গঢ়ি উঠিছে? শিক্ষাৰ্থী সকলক শোষিত নিষ্পেষিত ধৰ্মীয় সংখ্যালঘু লোকসকলৰ প্ৰতি কেনে মনোভাৱৰ গঢ় দিয়া হৈছে?

তেওঁ লগতে কয়, “ইপিনে বড়োলেণ্ড টেৰিটৰিয়েল অঞ্চল (বিটিআৰ)ৰ মুৰব্বী প্ৰমোদ বড়ো এই পৰ্যন্ত  মৌনব্ৰত পালন কৰা কাৰ্যই আমাৰ মনত কিছু সন্দেহৰ উদয় হৈছে। আগন্তুক লোকসভা নিৰ্বাচনৰ পূৰ্বে এনে কিছু কৰ্ম কাণ্ডই সাধাৰণ জনতাক বিপথে পৰিচালিত কৰি সাধাৰণ ভোটাৰৰ মনত “ইছলামফ’বিয়া” সোমোৱাই দিয়া হৈছে বুলি বৌদ্ধিক মহলত চৰ্চা হৈছে।‘’

লগতে পঢ়কঃ লাভ জেহাদৰ অভিযোগত গুৱাহাটীত গ্ৰেপ্তাৰ ইছলাম ধৰ্মীয় যুৱক

দলটোৱে বিশ্ববিদ্যালয়ৰ কৰ্তৃপক্ষ তথা বড়োলেণ্ড টেৰিটৰিয়েল ৰিজনৰ মুৰব্বী প্ৰমোদ বড়োক সকীয়াই দি কয় যে কোনো ধৰ্মীয় আৱেগত আঘাত সানিব পৰা কাৰ্য যাতে শিক্ষানুষ্ঠান খনত পুনৰাবৃত্তি নহয়। তেওঁলোকে বিটিআৰ প্ৰশাসনকো ইয়াৰ সৈতে জড়িত লোকসকলৰ বিৰুদ্ধে ব্যৱস্থা ল’বলৈ দাবী জনাইছে।