April Fool! কিয় ১ এপ্ৰিলক ‘মূৰ্খৰ দিৱস’ হিচাপে পালন কৰা হয়? চাও আহক ইয়াৰ ইতিহাস আৰু গুৰুত্ব

প্ৰতি বছৰে ১ এপ্ৰিলত ‘এপ্ৰিল ফুল দিৱস’ (মুৰ্খ সজোৱাৰ দিন ) পালন কৰা হয়। এইটো এটা হাঁহি আৰু ধেমালিৰে ভৰা দিন। এই দিনটোত মানুহে বন্ধু-বান্ধৱ আৰু পৰিয়ালৰ সৈতে ৰগৰ কৰে, বিভিন্ন ধেমেলীয়া বাৰ্তা প্ৰেৰণ কৰে।

এপ্ৰিল ফুল দিৱস উদযাপনৰ সৈতে বহু আমোদজনক কাহিনী আছে। আজিৰ দিনটোৰ লগত জড়িত কিছুমান বিশেষ কথা জানো আহক।

‘এপ্ৰিল ফুল দিৱস’ৰ ইতিহাস

একাংশ লোকৰ মতে এই দিনটো ২৫ মাৰ্চত পালন কৰা প্ৰাচীন ৰোমান উৎসৱ ‘হিলাৰিয়া’ৰ সৈতে জড়িত। এই উৎসৱৰ সময়ত মানুহে ইজনে সিজনৰ লগত ধেমালি কৰিছিল।

বহুতে বিশ্বাস কৰে যে ষোড়শ শতিকাত ফ্ৰান্সত ‘এপ্ৰিল ফুল দিৱস’ আৰম্ভ হৈছিল। আজিৰ দিনটো অৰ্থাৎ ১ এপ্ৰিলত ফ্ৰান্সত নৱবৰ্ষ পালন কৰা হয়। ১৫৮২ চনত ফ্ৰান্সৰ ৰজা নৱম চাৰ্লছে ১ জানুৱাৰীত নৱবৰ্ষ উদযাপন কৰাৰ সিদ্ধান্ত লয়। একাংশ লোকে এই পৰিৱৰ্তন মানি ল’ব নোৱাৰি ১ এপ্ৰিলতো নৱবৰ্ষ উদযাপন কৰি থাকিল। এই লোকসকলক ‘এপ্ৰিল ফুল’ বুলি কোৱা হৈছিল।

লাহে লাহে এপ্ৰিল ফুল দিৱস উদযাপনৰ ধাৰাটোৱে সমগ্ৰ বিশ্বতে বিয়পি পৰিল। ঠাট্টা আৰু ধেমালিৰ লগত জড়িত এটা জনপ্ৰিয় দিন হৈ পৰে।

ভাৰতত কেনেকৈ আৰম্ভ হ’ল?

ভাৰতত এপ্ৰিল ফুল দিৱস উদযাপনৰ কাৰ্যসূচী ব্ৰিটিছে ১৯ শতিকাত আৰম্ভ কৰিছিল। সেই সময়ত ভাৰত ব্ৰিটিছ শাসনৰ অধীনত আছিল আৰু তেওঁলোকে নিজৰ সংস্কৃতি আৰু পৰম্পৰা ভাৰতলৈ লৈ আহিছিল, এপ্ৰিল ফুল দিৱস আছিল তাৰ ভিতৰত অন্যতম। লাহে লাহে এই দিনটো ভাৰতত জনপ্ৰিয় হৈ উঠিল আৰু মানুহে উদযাপন কৰিবলৈ ধৰিলে।

আগতে কেৱল চহৰতহে ইয়াক উদযাপন কৰা হৈছিল যদিও এতিয়া গ্ৰাম্য অঞ্চলতো ই জনপ্ৰিয় হৈ পৰিছে। ছ’চিয়েল মিডিয়াৰ আগমনৰ পিছত এপ্ৰিল ফুল দিৱসৰ জনপ্ৰিয়তা বৃদ্ধি পালে। এতিয়া মানুহে ইজনে সিজনৰ লগত ছ’চিয়েল মিডিয়াত ধেমালি কৰি এপ্ৰিল ফুল দিৱসৰ শুভেচ্ছা জনায়।