১৭ ঘণ্টা ধৰি ৫০ ফুট দ কুঁৱাত আবদ্ধ হৈ থকাৰ পাছত প্ৰাণ হেৰুৱালে ডেৰ বছৰীয়া কণমানি আৰোহীয়ে

গুজৰাটৰ আমৰেলীৰ সুৰগাপুৰা গাঁৱৰ কণমানি আৰোহীৰ হাঁহিৰ কোলাহল আৰু শুনা পোৱা নাযাব। সৰু ভৰি দুখনিৰে গাঁৱৰ পথাৰত বা আলিবাটত দৌৰিব নোৱাৰিব আৰোহী৷ এটা মৰ্মান্তিক দুৰ্ঘটনাই আৰোহীক চিৰদিনৰ বাবে আঁতৰি যাবলৈ বাধ্য কৰালে। আৰোহীৰ মৃত্যুৰ পাছত পৰিয়ালটোৰ লগতে সমগ্ৰ গাঁওখন শোকত ভাগি পৰিছে।

ঘটনাক্ৰমে গাঁৱৰ খেলপথাৰত খেলি থাকোঁতে হঠাতে আৰোহী এটা কুঁৱাত পৰি গৈছিল। পথাৰখনৰ মাজভাগত এটা ৪৫-৫০ ফুট দ গাঁত আছিল, যিটো আৰোহীয়ে লক্ষ্য কৰা নাছিল। ঘটনাৰ পাছত অৱগত হোৱাৰ পাছতে লগে লগে স্থানীয় আৰক্ষীক খবৰ দিয়া হয়। পাছত দুৰ্যোগ ব্যৱস্থাপনা দল আৰু অগ্নিনিৰ্বাপক বাহিনীক খবৰ দিয়া হয়।

প্ৰথমতে এনে লাগিছিল যেন কেইঘণ্টামানৰ ভিতৰতে হয়তো আৰোহীক গাঁতৰ পৰা উলিয়াই আনিব পৰা যাব। উদ্ধাৰকাৰী দলটোৱে প্ৰথম ৩-৪ ঘণ্টা তেওঁৰ সৈতে যোগাযোগ ৰাখিবলৈ সক্ষম হয়। গাঁতটোত যাতে অক্সিজেনৰ অভাৱ নহয় তাৰ ব্যৱস্থা কৰা হৈছিল। লগতে, ৰছীত সামান্য পৰিমাণৰ খাদ্য পঠিয়াবলৈ চেষ্টা কৰা হৈছিল।

প্ৰায় ১০ ঘণ্টা পাৰ হোৱাৰ পাছত গাঁতটোৰ পৰা আৰু কোনো শব্দ নহা হ’ল। উদ্ধাৰকাৰী দলৰ সৈতে কাৰ্যতঃ যোগাযোগ হেৰুৱাই পেলাইছিল আৰোহীয়ে৷ তেতিয়া সকলোৱে অনুমান কৰিলে কি হ’ব। তথাপিও কমেও ৭ ঘণ্টা পাৰ হৈ গ’ল। আৰোহীজনক উদ্ধাৰৰ প্ৰচেষ্টা সফল নহ’ল। অৱশেষত উদ্ধাৰকাৰী দলটোৱে সফলতা লাভ কৰে। ১৭ ঘণ্টাৰ অন্তত ৫০ ফুট দ কুঁৱাৰ পৰা উদ্ধাৰ কৰে আৰোহীজনক।

কিন্তু উদ্ধাৰকাৰী দলটোৱে গাঁতৰ পৰা ডেৰ বছৰীয়া আৰোহীৰ নিৰ্জীৱ মৃতদেহ উলিয়াই আনিবলৈ সক্ষম হয়। বহুতে ভাবিছিল যে শিশুটি হয়তো অজ্ঞান হৈ পৰিছে। ততাতৈয়াকৈ তেওঁক চিকিৎসালয়লৈ প্ৰেৰণ কৰা হয়। কিন্তু ডাক্তৰে কয় যে, ইতিমধ্যে আৰোহীৰ মৃত্যু হৈছে।বৰ্তমান শিশুটিৰ মৃতদেহ মৰণোত্তৰ পৰীক্ষাৰ বাবে প্ৰেৰণ কৰা হৈছে। এই ঘটনাত পৰিয়ালৰ লোক ক্ষোভিত হোৱাৰ লগতে ক্ষোভিত হৈ পৰিছে গাঁওবাসী। তেওঁলোক পথাৰত ইমান দ কুঁৱা খোলা ৰখাৰ বাবে প্ৰশ্ন উত্থাপন কৰে৷