আৰ্থিক দুৰ্নীতিৰ অভিযোগত পুনৰ বিপদত আজহাৰুদ্দিন; প্ৰাক্তন ক্ৰিকেটাৰগৰাকীক তলব ইডিৰ

ভাৰতীয় ক্ৰিকেট দলৰ প্ৰাক্তন অধিনায়ক মহম্মদ আজহাৰুদ্দিনৰ বিৰুদ্ধে পুনৰ আৰ্থিক দুৰ্নীতিৰ অভিযোগ উত্থাপন হৈছে। হায়দৰাবাদ ক্ৰিকেট সন্থাৰ বিত্তীয় জালিয়াতিৰ গোচৰতো তেওঁৰ নাম জড়িত হৈ পৰিছে।

ইতিমধ্যে তেওঁক বলবৎকাৰী সঞ্চালকালয়ে (ইডি) তলব কৰিছে। জানিব পৰা মতে বৃহস্পতিবাৰে তেওঁ হাজিৰ হ’ব লাগিব।

উল্লেখ্য যে মহম্মদ আজহাৰুদ্দিন পূৰ্বে হায়দৰাবাদ ক্ৰিকেট সন্থাৰ সভাপতি আছিল। সেই সময়ত তেওঁ সন্থাৰ আৰ্থিক পুঁজিৰ অপব্যৱহাৰ কৰাৰ অভিযোগ উঠিছে। এই গোচৰত কংগ্ৰেছৰ বিশিষ্ট নেতাগৰাকীক ইডিয়ে প্ৰথমবাৰৰ বাবে তলব কৰিছে।

লগতে পঢ়কঃ ছিংগাপুৰৰ বিৰল দুৰ্নীতিৰ গোচৰত বদনামী প্ৰাক্তন মন্ত্ৰী সুব্ৰমনিয়ম ইশ্বৰনক কাৰাদণ্ড

সূত্ৰ অনুসৰি, ৬১ বছৰীয়া এইগৰাকী প্ৰাক্তন ভাৰতীয় ক্ৰিকেটাৰে ২০ কোটি টকাৰ আৰ্থিক জালিয়াতি সংঘটিত কৰিছে। এই ধন ৰাজীৱ গান্ধী ক্ৰিকেট ষ্টেডিয়ামৰ বাবে ডিজেল জেনেৰেটৰ, অগ্নিনিৰ্বাপক যন্ত্ৰ আৰু টেণ্টৰ বাবে আৱণ্টন দিয়া হৈছিল।

মন কৰিবলগীয়া যে যোৱা বছৰ ইডিয়ে তেলেংগানাৰ মুঠ ৯টা স্থানত অভিযান চলাইছিল। এই ঘটনাত হায়দৰাবাদ ক্ৰিকেট সন্থাৰ প্ৰাক্তন বিষয়া গাদ্দাম বিনোদ, শিবলাল যাদৱ আৰু আৰ্ছাদ আয়ুবৰ ঘৰতো অভিযান চলাইছিল। তাৰ পিছতে ইডিৰ হাতলৈ কেইবাটাও চাঞ্চল্যকৰ তথ্য অহা বুলি কোৱা হৈছে।