পানীৰ বটল,চাইকেলত আৰোপিত সামগ্ৰী আৰু সেৱা শুল্ক হ্ৰাস! আৰু কি কি সামগ্ৰীত বঢ়া-টুটা হ’ল GSTৰ? সবিশেষ

বিৰোধীৰ দাবী মানি লৈ কেন্দ্রই জীৱন বীমা পলিচীত জি এছ টিৰ বৃহৎ ৰেহাই দিয়াৰ কথা ঘোষণা কৰিছে৷ জ্যেষ্ঠ নাগৰিকৰ স্বাস্থ্য বীমাৰ প্ৰিমিয়ামত সম্পূৰ্ণ জি এছ টি ৰেহাই। ইয়াৰ উপৰিও জীৱন বীমাৰ টাৰ্ম পলিচিৰ ওপৰতো জি এছ টি আৰোপ কৰিবলৈ গৈ আছে। কিন্তু এই অতিৰিক্ত ‘লাভ’ৰ বাবে আন জনতাই ধন দিব লাগিব। লোকচান হ্ৰাস কৰিবলৈ কেইবাটাও সামগ্ৰীৰ জি এছ টি বৃদ্ধি কৰাৰ সিদ্ধান্ত ঘোষণা কৰিবলৈ ওলাইছে জি এছ টি পৰিষদে।

সূত্ৰ অনুসৰি শনিবাৰে জি এছ টি পৰিষদে গঠন কৰা মন্ত্ৰী পৰিষদৰ বৈঠকত কেইবাটাও সামগ্ৰীৰ জি এছ টিৰ হাৰ সলনি কৰাৰ সিদ্ধান্ত লোৱা হৈছে। কিন্তু জি এছ টি ৰেট বৃদ্ধি মূলতঃ বিলাসী সামগ্ৰীৰ ওপৰত। সূত্ৰ অনুসৰি ২৫ হাজাৰতকৈ অধিক মূল্যৰ ঘড়ীৰ কৰ হাৰ ২৮ শতাংশলৈ বৃদ্ধি কৰাৰ প্ৰস্তাৱ আছে। বৰ্তমান ২৫ হাজাৰতকৈ অধিক মূল্যৰ ঘড়ীৰ ওপৰত ১৮ শতাংশ কৰ আৰোপ কৰা হয়। ১৫ হাজাৰতকৈ অধিক মূল্যৰ জোতাৰ ওপৰতো একে হাৰত বৃদ্ধি কৰা হ’ব জি এছ টি। অৰ্থাৎ সেই সামগ্ৰীৰ জি এছ টি ১৮ৰ পৰা ২৮ শতাংশলৈ বৃদ্ধি হ’বলৈ গৈ আছে।

কিন্তু একে সময়তে জি এছ টি পৰিষদে গঠন কৰা মন্ত্ৰী পৰিষদেও বহু দৈনন্দিন প্ৰয়োজনীয় সামগ্ৰীৰ জি এছ টি হ্ৰাস কৰাৰ প্ৰস্তাৱ আগবঢ়াইছে। প্ৰস্তাৱ অনুসৰি ২০ লিটাৰ পানীৰ বটলৰ জি এছ টি ১৮ শতাংশৰ পৰা ৫ শতাংশলৈ হ্ৰাস কৰাৰ প্ৰস্তাৱ দিয়া হৈছে। পুনৰ ১০ হাজাৰ টকাৰ তলৰ মূল্যৰ চাইকেলৰ জি এছ টি ১২ শতাংশৰ পৰা ৫ শতাংশলৈ হ্ৰাস কৰা হ’ব। দৰাচলতে চৰকাৰে এই পৰিবেশ অনুকূল বাহনসমূহৰ বিক্ৰীৰ বাবে উৎসাহ যোগাব বিচাৰিছে।

উল্লেখ্য যে, জীৱন বীমাৰ জি এছ টি ৰেহাইয়ে কেন্দ্ৰীয় ৰাজকোষত হেঁচা প্ৰয়োগ কৰিব পাৰে। বছৰৰ মাজভাগত যদি তেনেকুৱা হয় তেন্তে বিত্তীয় ঘাটি বৃদ্ধি পাব পাৰে। বিলাসী জোতা আৰু ঘড়ীৰ ওপৰত কৰ বৃদ্ধিৰ সিদ্ধান্ত সেই ঘাটি পূৰণৰ বাবে। চৰকাৰী সূত্ৰ অনুসৰি এই সিদ্ধান্তসমূহ কাৰ্যকৰী হ’লে বছৰি ২২ হাজাৰ কোটি টকাৰ অতিৰিক্ত কৰ সংগ্ৰহ কৰা হ’ব।