আন এজন দশৰথ মাঝি! জনতাৰ বাবে ৩.৫ কিঃমিঃ খটখটী নিৰ্মাণ কৰিলে বিহাৰৰ ৮০ বছৰীয়া বৃদ্ধই

দশৰথ মাঝিৰ কথা মনত আছেনে। দশৰথ মাঝি গৈছে বিহাৰৰ গেহল’ৰ জিলাৰ এজন ব্যক্তি। যি নিজৰ পত্নীৰ স্মৃতিত জনতাত সুবিধাৰ্থে অকলেই এটা বিশাল পাহাৰ কাটি ৰাস্তা মুকলি কৰিছিল। যাতে সেই ৰাস্তাইদি মানুহ সোনকালে হাস্পাতাল গৈ পায়। নাৱাজুদ্দিন চিদ্দিকিয়ে অভিনয় কৰা ‘মাঝি দ্য মাউণ্টেন মেন’ নামৰ চিনেমাখনৰ পিছতেই দেশৰ সকলো ঠাইতেই দশৰথ মাঝিৰ এই মহান কামটোৰ বিষয়ে খবৰ বিয়পি পৰিছিল।

এতিয়া দশৰথ মাঝিৰ দৰেই আকৌ আন এজন ব্যক্তিৰ আবিৰ্ভাৱ হৈছে বিহাৰত। বিহাৰৰ গয়া জিলাৰ বেলাগঞ্জৰ ভালৱা অৰণ্যৰ বাসিন্দা শ্যাম সুন্দৰ চৌহান নামৰ ৮০ বছৰীয়া এগৰাকী ব্যক্তিয়ে বিগত ২৫ বছৰ ধৰি জিলাখনৰ এটা পাহাৰৰ ওপৰত থকা প্রসিদ্ধ সিদ্ধেশ্বৰ নাথ মন্দিৰলৈ অহা-যোৱা কৰা বাট সুচল কৰাৰ বাবে অশেষ কষ্ট স্বীকাৰ কৰি কাটি উলিয়াইছে ৩.৫ কিলোমিটাৰ শিলৰ খটখটী।

জানিব পৰা মতে, যোৱা ২৫ বছৰে প্ৰতি সোমবাৰে পুৱাৰ পৰা গধূলিলৈকে খটখটী নিৰ্মাণ কৰিছিল চৌহানে। এইদৰে ২৫ বছৰৰ নিৰলস প্ৰচেষ্টাৰে খটখটী সজা কাম সম্পূৰ্ণ কৰি উলিয়াইছে শ্যাম সুন্দৰ চৌহানে।