নিৰ্বাচনৰ অভিমুখে থকা মেঘালয় ভ্ৰমণলৈ আহিব নিৰ্বাচন আয়োগৰ দল

অহা ১৩ ডিচেম্বৰত বিধানসভা নিৰ্বাচনৰ অভিমুখে থকা মেঘালয় ভ্ৰমণলৈ আহিব নিৰ্বাচন আয়োগৰ এটা পাঁচজনীয়া দল। এই কথা আজি ব্যক্ত কৰে মেঘালয়ৰ মুখ্য নিৰ্বাচন আয়ুক্ত কে এফ খাৰকনগৰে এই কথা কয়। এই দলটোৰ নেতৃত্বত থাকিব মেঘালয়ৰ দায়িত্বত থকা উপ নিৰ্বাচন আয়ুক্ত। দলটোৱে নিৰ্বাচন সম্পৰ্কীয় প্ৰস্তুতি, নিৰ্বাচনী ব্যয় তদাৰক, নিৰাপত্তা, ই ভি এম, ভি ভি পি এ টি আৰু অন্যান্য আনুষংগিক বিষয় পৰ্য্যৱেক্ষণ কৰিব। তেওঁ লগতে কয় যে দলটোৱে ১১ খন জিলাৰ উপায়ুক্ত, জিলাৰ আৰক্ষী অধীক্ষকসকলৰ সৈতে নিৰ্বাচন সম্পৰ্কীয় প্ৰস্তুতিৰ এক পৰ্য্যালোচনা সভাত অংশ গ্ৰহণ কৰিব। লগতে বিভিন্ন ৰাজনৈতিক দলৰ প্ৰতিনিধিৰ সৈতে এক চমু আলোচনাতো দলটো মিলিত হোৱাৰ কথা। তাৰ পিছতে দলটোৱে মেঘালয়ৰ মুখ্য সচিব ৱাই ছেৰিং আৰু আৰক্ষী সঞ্চালক প্ৰধান এছ বি সিঙৰ সৈতেও আগন্তুক নিৰ্বাচন সম্পৰ্কীয় এখন আলোচনা সভাত বহিব।

উল্লেখযোগ্য যে চলিত মেঘালয় বিধানসভাৰ কাৰ্য্যকাল অন্ত পৰিব অহা ৬ মাৰ্চত। তাৰ পৰিপ্ৰেক্ষিততে অহা বছৰৰ প্ৰথম ভাগতেই (ফেব্ৰুৱাৰি-মাৰ্চৰ ভিতৰত) নিৰ্বাচন হোৱাৰ কথা। তাৰ বাবে ইতিপূৰ্বে ৰাজ্যখনৰ ৰাজনৈতিক বতাহ গৰম হৈ উঠিছে। বিজেপিকে ধৰি বিভিন্ন ৰাজনৈতিক দলসমূহে নিজৰ নিজৰ পৰিসৰত কুচকাৱাজ আৰম্ভ কৰা দেখা গৈছে। বিজেপিয়ে অকলে নিৰ্বাচন খেলাৰ কথা কৈ আছিল যদিও যোৱা ৯ ডিচেম্বৰত সুৰ সলনি কৰি অন্য দলৰ সৈতে মিত্ৰতা কৰাৰ কথা ঘোষণা কৰিছিল।