তৃতীয় বিশ্বযুদ্ধ ইমানদিনে লাগি গ’লহেঁতেন, ভাগ্য ভাল যে মই সময়তে ৰাষ্ট্ৰপতি হ’লো: ড’নাল্ড ট্ৰাম্প

তৃতীয় বিশ্বযুদ্ধৰ পৰা পৃথিৱী বহু দূৰত নাই, তেওঁৰ নেতৃত্বতহে এনে যুদ্ধ ৰোধ কৰা সম্ভৱ হ’ব। বৃহস্পতিবাৰে মিয়ামীত অনুষ্ঠিত এক সন্মিলনত ভাষণ দি এই দাবী  কৰে আমেৰিকাৰ ৰাষ্ট্ৰপতি ড’নাল্ড ট্ৰাম্পে।

ট্ৰাম্পৰ মতে, যদিহে প্ৰাক্তন ৰাষ্ট্ৰপতি জো বাইডেনে আমেৰিকাত আৰু এবছৰ ক্ষমতাত থাকিলহেঁতেন তেন্তে এতিয়ালৈকে তৃতীয় বিশ্বযুদ্ধ আৰম্ভ হ’লহেঁতেন।

ট্ৰাম্পে কয় যে তৃতীয় বিশ্বযুদ্ধৰ পৰা কোনেও লাভৱান নহয়। কিন্তু মই এতিয়াই ক’ব পাৰো, আপুনি যুদ্ধৰ পৰা বহু দূৰত নহয়। এই প্ৰশাসন যদি আৰু এবছৰ চলিলহেঁতেন তেন্তে আপুনি নিশ্চয় যুদ্ধৰ মাজত সোমাই পৰিলহেঁতেন। কিন্তু এতিয়া তেনেকুৱা নহ’ব, মই ইয়াত আছো।’

ট্ৰাম্পে লগতে কয় যে যদিও আমেৰিকাই কোনো যুদ্ধত প্ৰত্যক্ষভাৱে অংশগ্ৰহণ নকৰে, তথাপিও এনে সংঘাত সংঘটিত হ’লে তেওঁ বন্ধ কৰাৰ পদক্ষেপ গ্ৰহণ কৰিব। তেওঁৰ ভাষাত, ‘আমি এই অৰ্থহীন আৰু অমীমাংসিত যুদ্ধবোৰ বন্ধ কৰি দিম। আমি নিজে এই যুদ্ধবোৰত লিপ্ত নহওঁ, কিন্তু আমি আন সকলোতকৈ শক্তিশালী হৈ থাকিম। যদি কেতিয়াবা যুদ্ধ হয় তেন্তে আমাৰ লগত কোনেও প্ৰতিদ্বন্দ্বিতা কৰিব নোৱাৰিব। কিন্তু তেনেকুৱা একো হ’ব বুলি মই নাভাবো।’

ট্ৰাম্পে তেওঁৰ ভাষণত ইউক্ৰেইনৰ ৰাষ্ট্ৰপতি ভ’ল’ডিমাইৰ জেলেনস্কিক কঠোৰভাৱে আক্ৰমণ কৰে। তেওঁ কয় যে ইউক্ৰেইনৰ যুদ্ধত আমেৰিকাই ইউৰোপতকৈ ২০০ বিলিয়ন ডলাৰ অধিক ব্যয় কৰিছে, তথাপিও ইউৰোপৰ পৰা আমেৰিকাই কোনো প্ৰতিদান পোৱা নাই।

ট্ৰাম্পে দাবী কৰে যে জেলেনস্কিয়ে আমেৰিকাক এনে এক যুদ্ধত বিপুল পৰিমাণৰ ধন বিনিয়োগ কৰিবলৈ পতিয়ন নিয়াইছে যিটো অসম্ভৱ। ইউৰোপেও ইমান টকা দিয়া নাই। আটাইতকৈ ডাঙৰ কথাটো হ’ল এই যুদ্ধ আৰম্ভ কৰাৰে প্ৰয়োজন নাছিল।