ৰাষ্ট্ৰীয় নিৰাপত্তাত আপোচ কেন্দ্ৰৰ, পাক সীমান্তত আদানীৰ বিদ্যুৎ প্ৰকল্প! উত্তাল সংসদ

মোদী চৰকাৰৰ বাবে ৰাষ্ট্ৰীয় নিৰাপত্তাতকৈ আদানীৰ স্বাৰ্থ অধিক গুৰুত্বপূৰ্ণ নেকি? এই লৈ সদনত কেন্দ্ৰক আক্ৰমণৰ লক্ষ্য কৰি লয় কংগ্ৰেছে।

গুজৰাটৰ কুটচৰ খাভৰাত নবীকৰণযোগ্য শক্তি প্ৰকল্পৰ বাবে আদানী গ্ৰুপক প্ৰদান কৰা হৈছে। যিটো ভাৰত-পাকিস্তান আন্তঃৰাষ্ট্ৰীয় সীমান্তৰ পৰা এক কিলোমিটাৰ দূৰত্বলৈ বিস্তৃত হৈ আছে। লোকসভাৰ অধিৱেশনৰ প্ৰশ্নোত্তৰ  সময়ত কংগ্ৰেছ সাংসদ মনীষ তিৱাৰীয়ে সদনত এই প্ৰকল্প সন্দৰ্ভত প্ৰশ্ন উত্থাপন কৰে।

ৰাষ্ট্ৰীয় নিৰাপত্তা নীতি অনুসৰি সীমান্তৰ পৰা ১০ কিলোমিটাৰৰ ভিতৰত কোনো প্ৰকল্পৰ অনুমতি দিব নোৱাৰে বুলি উল্লেখ কৰি,  এই ক্ষেত্ৰত কিয় কোনো ব্যৱ্স্থা কৰা নহ’ল বুলি প্ৰশ্ন কৰে।

ইয়াৰ উত্তৰত সংশ্লিষ্ট মন্ত্ৰালয়ৰ দায়িত্বত থকা মন্ত্ৰী প্ৰহ্লাদ যোশীয়ে যি কাম কৰা হৈছে কেন্দ্ৰীয় আৰু ৰাজ্য চৰকাৰৰ বিভিন্ন মন্ত্ৰালয় আৰু বিভাগৰ অনুমতি সাপেক্ষে কৰা হৈছে বুলি দায় সামৰে।

কংগ্ৰেছ আৰু অন্যান্য বিৰোধী দলসমূহে এই সঁহাৰিৰ প্ৰতি আপত্তি দৰ্শাই সদন ত্যাগ কৰিছিল।

মনীষ তিৱাৰী আৰু লোকসভাৰ কংগ্ৰেছৰ নেতা গৌৰৱ গগৈয়ে কটাক্ষ কৰি কয়  ৰাষ্ট্ৰীয় নিৰাপত্তাৰ কথা কোৱা দলটোৱে আজি নিজৰ বন্ধু বাবে ৰাষ্ট্ৰীয় নিৰাপত্তাৰ সৈতে খেলা কৰিছে।

ইয়াৰ পূৰ্বেও আদানী উৎকোচ কেলেংকাৰীক লৈ সংসদত  সৰৱ চৰ্চা চলি আহিছে। অৱশ্যে এইবাৰ কংগ্ৰেছে পোনপটীয়াকৈ ৰাষ্ট্ৰীয় নিৰাপত্তাৰ বিষয়টো উত্থাপন কৰে।