অভাৱনীয় ক্ষতি : ম্যানমাৰৰ ভূমিকম্পত নিহতৰ সংখ্যা ১৪৪ জনলৈ বৃদ্ধি, ধ্বংসাৱশেষতো আৱদ্ধ ‎অনেক লোক

শুকুৰাবাৰে ম্যানমাৰত হোৱা ৭.৭ ৰিখটাৰ স্কেলত হোৱা প্ৰবল ভূমিকম্পই জোঁকাৰি গৈছে সমগ্ৰ বিশ্ব।

এতিয়ালৈ ম্যানমাৰত নিহত হোৱা লোকৰ সংখ্যা ১৪৪ জনলৈ বৃদ্ধি পাইছে। ইয়াৰ উপৰিও ধ্বংসাৱশেষতো অনেক লোক আৱদ্ধ হৈ থকা বুলি অনুমান কৰা হৈছে। এতিয়াও উদ্ধাৰকাৰীয়ে আহত আৰু নিহতসকলক উদ্ধাৰৰ বাবে অভিযান চলাই আছে।

উল্লেখ্য যে ৭.৭ ৰিখটাৰ স্কেলত অহা ভূমিকম্পৰ পিছত ৬.৪ ৰিখটাৰ স্কেলত হোৱা আফটাৰশ্বকত ম্যানমাৰৰ কেইবাখনো চহৰৰ অট্টালিকা আৰু দলং খহি পৰে। যাৰ ফলত অস্বাভাৱিক হাৰত মানুহৰ মৃত্যু হয়।

ঠিক ম্যানমাৰৰ লগতে চুবুৰীয়া ৰাষ্ট্ৰ থাইলেণ্ডতো এই ভূমিকম্প অনুভৱ কৰা হয়।

থাইলেণ্ডলতো এটা অট্টালিকা ভাঙি পৰাৰ ফলত ১১৭ জনতকৈ অধিক লোক আবদ্ধ হৈ পৰে আৰু ৮ জন লোকৰ মৃত্যু হয়। জানিব পৰা মতে, থাইলেণ্ড চৰকাৰে এই পৰিস্থিতিৰে মোকাবিলা কৰিবলৈ দুদিনৰ বাবে ৰাষ্ট্ৰীয় জৰুৰীকালিন অৱস্থাৰ ঘোষণা কৰিছে।

ম্যানমাৰৰ সামৰিক চৰকাৰৰ মুৰব্বীয়ে ম্যানমাৰত ১৪৪ জন লোকৰ মৃত্যু হোৱা বুলি নিশ্চিত কৰিছে, কেইবাটাও অঞ্চল দুৰ্গম হৈ থকাৰ বাবে এই সংখ্যা বৃদ্ধি হ’ব পাৰে বুলি আশংকা কৰা হৈছে।

ম্যানমাৰৰ শাসকীয় সামৰিক জন্টায়ো কেইবাটাও ক্ষেত্ৰত জৰুৰীকালীন অৱস্থা ঘোষণা কৰিছে। ইয়াৰ উপৰিও আন আন ৰাষ্ট্ৰ সমূহৰ পৰা তাৎক্ষণিক সহায় বিচাৰিছে। ভাৰতৰ প্ৰধানমন্ত্ৰী নৰেন্দ্ৰ মোদীৰ লগতে কেইবাখনো ৰাষ্ট্ৰৰ মূৰব্বীয়ে সহায় প্ৰদানৰ আশ্বাস দিছে।