পেহেলগাম আক্ৰমণৰ প্ৰতিক্ৰিয়া! ভাৰতত বন্ধ কৰি দিয়া হ’ল পাকিস্তান চৰকাৰৰ এক্স একাউণ্ট

দক্ষিণ কাশ্মীৰৰ পেহেলগামত উগ্ৰপন্থীৰ আক্ৰমণত কমেও ২৬জন পৰ্যটক নিহত হৈছে। বুধবাৰে নিশা প্ৰধানমন্ত্ৰী নৰেন্দ্ৰ মোদীৰ বাসভৱনত অনুষ্ঠিত জৰুৰী বৈঠকৰ অন্তত ভাৰতে পাকিস্তানৰ বিৰুদ্ধে পাঁচ দফীয়া ব্যৱস্থা ঘোষণা কৰে। আনহাতে,  বৃহস্পতিবাৰে পুৱাই লোৱা হ’ল ষষ্ঠ পদক্ষেপটো। বৃহস্পতিবাৰে পুৱা ভাৰতত পাকিস্তানৰ চৰকাৰী এক্স একাউণ্ট বন্ধ কৰি দিয়া হ’ল।

বুধবাৰে সন্ধিয়া দিল্লীৰ ৭ লোক কল্যাণ মাৰ্গত প্ৰধানমন্ত্ৰীৰ চৰকাৰী বাসভৱনত পেহেলগাম আক্ৰমণৰ পৰ্যালোচনাৰ বাবে কেবিনেট কমিটি অন ছিকিউৰিটিৰ বৈঠক অনুষ্ঠিত হয়। বৈঠকৰ অন্তত বৈদেশিক সচিব বিক্ৰম মিশ্ৰীয়ে কয় যে পাকিস্তানৰ বিৰুদ্ধে পাঁচটা পদক্ষেপ লোৱা হৈছে।

তেওঁ কয় যে সীমা অতিক্ৰম কৰি সন্ত্ৰাসবাদৰ প্ৰতি পাকিস্তানে সমৰ্থন প্ৰত্যাহাৰ নকৰালৈকে দিল্লীয়ে সিন্ধু জল চুক্তি স্থগিত ৰখাৰ সিদ্ধান্ত লৈছে। তদুপৰি আটাৰী-বাঘা সীমান্তত চলাচল বন্ধ কৰা হৈছে আৰু যিসকলে উপযুক্ত নথি-পত্ৰ লৈ এই সীমান্তৰে ভাৰতত প্ৰৱেশ কৰিছে তেওঁলোকক ১ মে’ৰ ভিতৰত পাকিস্তানলৈ উভতি যাবলৈ সময় দিয়া হৈছে।

ভাৰত ঘোষণা কৰিছে যে ছাৰ্ক ভিছা ৰেহাই আঁচনিৰ অধীনত কোনো পাকিস্তানী নাগৰিকক দেশত প্ৰৱেশ কৰিবলৈ দিয়া নহ’ব। সেই ভিছা আঁচনিৰ অধীনত বৰ্তমান ভাৰতত থকা সকলো পাকিস্তানীয়ে ৪৮ ঘন্টাৰ ভিতৰত দেশ এৰি যাব লাগিব।

পাকিস্তানৰ সামৰিক উপদেষ্টাসকলক ‘অবাঞ্চিত’ বুলি ঘোষণা কৰাৰ উপৰিও ভাৰতে ঘোষণা কৰে যে সেই দেশত ভাৰতীয় দূতাবাসৰ সদস্যৰ সংখ্যা ৫৫ৰ পৰা ৩০লৈ হ্ৰাস কৰা হৈছে। সেইদৰে, বৃহস্পতিবাৰে পুৱা ঘোষণা কৰা হ’ল যে ভাৰতত পাকিস্তানৰ চৰকাৰী এক্স একাউণ্ট বন্ধ কৰা হৈছে।