উত্তৰ কাছাৰ পাঃ স্বাঃ শাঃ পৰিষদৰ কাৰ্যকাল পুনৰ বৃদ্ধি ৰাজ্যপালৰ; ন্যায়ালয়মুখী অগপ

ৰাজ্যপাল জগদীশ মূখীৰ নিৰ্দেশমৰ্মে অহা ৩ জুনত অন্ত পৰিব লগীয়া উত্তৰ কাছাৰ পাৰ্বত্য স্বায়ত্ত শাসিত পৰিষদৰ কাৰ্যকাল পুনৰ ৬ মাহলৈ বৃদ্ধি কৰিছে। আনহাতে ইয়াৰ প্ৰতিবাদত শাসনাধিস্থ মিত্ৰদল অগপই ন্যায়ালয়ৰ দ্বাৰস্থ হোৱাৰ সিদ্ধান্ত লৈছে।

উল্লেখযোগ্য যে পাৰ্বত্য এলেকা উন্নয়ন দপ্তৰৰ আয়ুক্ত সচিব আনোৱাৰুদ্দিন চৌধুৰীয়ে আজি এক জাননী যোগে ৰাজ্যপালৰ নিৰ্দেশৰ কথা সদৰী কৰিছিল।

জাননীটোৰ মতে বৰ্তমান চলি থকা এন আৰ চিৰ উন্নীতকৰণ প্ৰক্ৰিয়াত যিহেতু ৮০ শতাংশ বিষয়া-কৰ্মচাৰীয়ে নিয়োজিত হৈ আছে সেয়ে পৰিষদৰ নিৰ্বাচন সময়মতে অনুষ্ঠিত কৰিব পৰা নাযাব।

ৰাজ্যপালৰ উক্ত নিৰ্দেশ সম্পৰ্কত প্ৰতিক্ৰিয়া প্ৰকাশ কৰি উত্তৰ কাছাৰ পাৰ্বত্য স্বায়ত্ত শাসিত পৰিষদৰ প্ৰাক্তন মুখ্য কাৰ্যবাসী সদস্য তথা অগপৰ সাংগঠনিক সম্পাদক দেবজিত থাউছেনে নৰ্থ-ইষ্ট নাওক কয়, ‘যদি পঞ্চায়ত নিৰ্বাচন ছেপ্টেম্বৰত অনুষ্ঠিত কৰিব পাৰে তেন্তে পৰিষদৰ নিৰ্বাচনো পঞ্চায়ত নিৰ্বাচনৰ আগত, পিছত বা একেলগেই অনুষ্ঠিত কৰিব পাৰে। আৰু তেতিয়ালৈকে আমি পৰিষদখনক ৰাজ্যপালৰ শাসনৰ অধীনত ৰাখিবলৈ ন্যায়ালয়ক অনুৰোধ জনাম, যিহেতু অহা ৩ জুনত বৰ্তমানৰ পৰিষদখনৰ কাৰ্যকাল অন্ত পৰিব।’

তেওঁ আৰু কয়, ‘যদি এন আৰ চিৰ বাবে এই সিদ্ধান্ত লোৱা হৈছে তেন্তে পঞ্চায়তৰ ক্ষেত্ৰত উচ্চ ন্যায়ালয়ে দিয়া নিৰ্দেশ অনুসৰি ইয়াক পিছুৱা হওক, কিন্তু তেতিয়ালৈকে পৰিষদে ৰাইজৰ জনাদেশ আৰু সংবিধানক সন্মানসহ মানি চলা উচিত।’

ৰাজ্যপালৰ উক্ত নিৰ্দেশৰ প্ৰতিবাদত আৰু সময়মতে নিৰ্বাচন অনুষ্ঠিত কৰাৰ দাবীত অগপৰ ডিমা হাচাও জিলা সমিতিয়ে আজি জিলা উপায়ুক্তৰ কাৰ্যালয়ৰ সন্মুখত প্ৰতিবাদ সাব্যস্ত কৰে।