অসমৰ জনসাধাৰণক বন্দুক নহয়, কৰ্মসংস্থাপন, সুলভ স্বাস্থ্যসেৱা আৰু মানসম্পন্ন শিক্ষাৰ প্ৰয়োজন: গৌৰৱ গগৈ

কংগ্ৰেছৰ সাংসদ তথা অসম কংগ্ৰেছৰ নৱ নিৰ্বাচিত ৰাজ্যিক সভাপতি গৌৰৱ গগৈয়ে অসমৰ মুখ্যমন্ত্ৰী হিমন্ত বিশ্ব শৰ্মাই ৰাজ্যৰ সীমান্তৱৰ্তী অঞ্চলত সাধাৰণ নাগৰিকক অস্ত্ৰৰ অনুজ্ঞাপত্ৰ দিয়াৰ সিদ্ধান্তক সমালোচনা কৰিছে।

বৃহস্পতিবাৰে নিশা গৌৰৱ গগৈয়ে ছ’চিয়েল মিডিয়াত লিখিছে- “ৰাজ্যৰ সীমান্তৱৰ্তী অঞ্চলত সাধাৰণ নাগৰিকক অস্ত্ৰ দিয়াৰ ক্ষেত্ৰত মুখ্যমন্ত্ৰীৰ সিদ্ধান্তক মই তীব্ৰ গৰিহণা দিছো। অসমৰ জনসাধাৰণক বন্দুক নহয়, কৰ্মসংস্থাপন, সুলভ স্বাস্থ্যসেৱা, মানসম্পন্ন শিক্ষাৰ প্ৰয়োজন।”

তেওঁ ইয়াক বৰ্তমানৰ ৰাজ্য চৰকাৰৰ ৰাজনীতি বুলি অভিহিত কৰি অভিযোগ কৰে যে, “আৰক্ষী আৰু সীমান্ত বাহিনীক শক্তিশালী কৰাৰ পৰিৱৰ্তে বিজেপি-আৰএছএছ সমৰ্থক আৰু স্থানীয় অপৰাধী ছিণ্ডিকেটৰ মাজত অস্ত্ৰ বিতৰণ কৰিব বিচাৰিছে।”

গৌৰৱ গগৈয়ে লগতে লিখিছে যে এই সিদ্ধান্তই ব্যক্তিগত প্ৰতিশোধৰ ভিত্তিত হিংসা আৰু অপৰাধ বৃদ্ধি কৰিব।

তেওঁ লিখিছে, “এয়া শাসন ব্যৱস্থা নহয়, ই অৰাজকতা আৰু জংঘলৰাজৰ দিশত এক বিপজ্জনক পদক্ষেপ। এই সিদ্ধান্তই জনসাধাৰণৰ প্ৰতি চিন্তা নহয়, নিৰ্বাচনী চিন্তাক প্ৰতিফলিত কৰে।”

ইয়াৰ পূৰ্বে ২৮ মে’ত অসমৰ মুখ্যমন্ত্ৰী হিমন্ত বিশ্ব শৰ্মাই অসমৰ স্পৰ্শকাতৰ অঞ্চলত বসবাস কৰা ৰাজ্যৰ খিলঞ্জীয়াক অস্ত্ৰৰ অনুজ্ঞাপত্ৰ প্ৰদানৰ বাবে এক বিশেষ আঁচনি ঘোষণা কৰিছিল।

তেওঁ কৈছিল যে ৰাজ্যৰ দুৰ্বল আৰু সীমান্ত অঞ্চলৰ খিলঞ্জীয়াক অস্ত্ৰৰ অনুজ্ঞাপত্ৰ প্ৰদানৰ এই বিশেষ আঁচনিৰ উদ্দেশ্য ইয়াৰ খিলঞ্জীয়াৰ স্বাৰ্থ সুৰক্ষিত কৰা।

ইয়াৰ পিছত এই আঁচনিৰ বিষয়ে বিতং তথ্য প্ৰকাশ কৰা হৈছে এটা ভিডিঅ’ত। অনুজ্ঞাপত্ৰ প্ৰদানৰ ক্ষেত্ৰত কঠোৰ তদন্ত কৰা হ’ব বুলিও তেওঁ লিখিছে।