কলকাতা উচ্চ ন্যায়ালয়ৰ নিৰ্দেশ; পত্নী হাছিনক মাহে ৪ লাখ টকা ভৰণ-পোষণ দিব লাগিব শ্বামীয়ে

বিচ্ছিন্ন পত্নী আৰু কন্যাৰ ভৰণ-পোষণৰ সৈতে জড়িত গোচৰটোত ভাৰতীয় ক্ৰিকেট দলৰ পেচাৰ মহম্মদ শ্বামীয়ে ডাঙৰ আৰ্থিক পৰিশোধৰ সন্মুখীন হ’বলগীয়া হয়। মঙলবাৰে কলিকতা উচ্চ ন্যায়ালয়ে কয় যে তেওঁ পত্নী হাছিন জাহানক প্ৰতিমাহে মুঠ ৪ লাখ টকা দিব লাগিব।

 এই ধনৰাশিত হাছিনৰ বাবে ১.৫ লাখ টকা আৰু কন্যাৰ বাবে ২.৫ লাখ টকা অন্তৰ্ভুক্ত কৰা হৈছে। ন্যায়াধীশ অজয় ​​কুমাৰ মুখাৰ্জীয়ে তেওঁৰ পৰ্যবেক্ষণত কয়, “শ্বামী এজন প্ৰতিষ্ঠিত ক্ৰিকেটাৰ। তেওঁ এই ধন দিব পাৰে।”

হাছিন জাহানে ২০১৮ চনত প্ৰথমবাৰৰ বাবে ভৰণ-পোষণৰ বাবে আদালতৰ কাষ চাপিছিল। সেই সময়ত তেওঁ নিজৰ বাবে ৭ লাখ টকা আৰু জীয়েকৰ শিক্ষাৰ খৰচৰ বাবে আৰু ৩ লাখ টকা দাবী কৰিছিল। কিন্তু সেই সময়ত আলিপুৰ আদালতে তেওঁৰ আবেদন নাকচ কৰি প্ৰতিমাহে মুঠ ১.৩০ লাখ টকা দিবলৈ নিৰ্দেশ দিছিল।

সেই ৰায়ৰ বিৰোধিতা কৰিবলৈ হাছিনে কলকাতা উচ্চ ন্যায়ালয়লৈ গৈছিল। তেওঁ আদালতত কয় যে ২০২১ চনত শ্বামীৰ বাৰ্ষিক আয় প্ৰায় ৭.২ কোটি টকা। তেওঁৰ মতে, তেওঁৰ কন্যাৰ শিক্ষাৰ খৰচৰ বাবে প্ৰতিমাহে গড়ে ৬ লাখ টকাৰ প্ৰয়োজন হয়। সকলো তথ্য পৰীক্ষা কৰি এতিয়া উচ্চ ন্যায়ালয়ে নিৰ্দেশ দিছে যে তেওঁৰ পত্নী আৰু সন্তানক প্ৰতিমাহে ৪ লাখ টকা দিব লাগে।

উচ্চ ন্যায়ালয়ে পৰ্যবেক্ষণ কৰে যে, “হাছিন জাহানে এককভাৱে ছোৱালীজনীৰ সকলো দায়িত্ব পালন কৰি আছে। এই পৰিস্থিতিত ভৰণ-পোষণৰ ধন বৃদ্ধি কৰাৰ প্ৰয়োজন আছে। ইচ্ছা কৰিলে শ্বামীয়েও ছোৱালীজনীৰ বাবে অতিৰিক্ত খৰচ কৰিব পাৰে।”