বিশ্বনাথ চাৰিআলিত প্ৰে’ছ ক্লাবৰ উদ্যোগত উদযাপন পৰিৱেশ দিৱস

সমগ্ৰ বিশ্বৰ লগতে আজি ৫ জুনত ভাৰতবৰ্ষৰ প্ৰতিখন ৰাজ্যত উদযাপন হ’ল বিশ্ব পৰিৱেশ দিৱস। সেয়েহে উত্তৰ অসমৰ এখন নিকা ষ্টে’শ্যন গঢ়ি তোলাৰ বিশেষ পদক্ষেপ গ্ৰহণ কৰে বিশ্বনাথ প্ৰেছ ক্লাবে। দুপৰীয়া ২ বজাৰ পৰা বিশ্বনাথ চাৰিআলি ৰে’ল ষ্টে’শ্যনত বিশ্বনাথ চাৰিআলি প্ৰে’ছ ক্লাবৰ উদ্যোগত পৰিৱেশ দিৱস উদযাপন কৰা হয়।

উল্লেখযোগ্য যে পূব শোণিতপুৰ বন সংমণ্ডল আৰু আৰ পি এফৰ সহযোগিতাত হোৱা এই অনুষ্ঠানত পূব শোণিতপুৰ বন সংমণ্ডলৰ বিষয়া সুহাস কদম, বিশ্বনাথ সমষ্টিৰ বিধায়ক প্ৰমোদ বৰঠাকুৰ, বিশ্বনাথ ৰে’ল আৰক্ষী বিষয়া প্ৰদীপ মিলি, বিশ্বনাথৰ বিশিষ্ট সমাজসেৱক অকণ শইকীয়া, প্ৰতাপ শৰ্মা, সূৰ্য বৰদলৈৰ লগতে বিশ্বনাথৰ কেইবাজনো সাংবাদিক আৰু সমাজ সচেতন ব্যক্তি উপস্থিত থাকে।

নিৰঞ্জন হাজৰিকাৰ সভাপতিত্বত অনুষ্ঠিত হোৱা উক্ত সভাৰ আৰম্ভণিতে বিধায়ক প্ৰমোদ বৰঠাকুৰ আৰু বন বিষয়া গৰাকীয়ে ষ্টেচনত হাতত ঝাৰু লৈ আংশিকভাৱে চাফা কৰি ডাষ্টবিন  বিতৰণ শুভাৰম্ভণি কৰে। ইয়াৰ পিছত বিশ্বনাথ চাৰিআলিৰ ৰে’ল ষ্টেচনটোক উত্তৰ অসমৰ ভিতৰতে নিকা ষ্টেচন কৰি গঢ়ি তোলাৰ বাবে পূৰ্ণ প্ৰয়াস কৰাৰ বিষয়ত এক গুৰুত্বপূৰ্ণ আলোচনা হয়।

পৰৱৰ্তী পৰ্যায়ত সভাৰ মাজতে ষ্টেচনৰ চৌহদত বৃক্ষ ৰোপণ কৰা হয়।