গাড়ীৰ পৰা উদ্ধাৰ দুই ভাতৃ-ভগ্নীৰ মৃতদেহ; গৃহ শিক্ষয়িত্ৰীৰ বিৰুদ্ধে হত্যাৰ অভিযোগ পৰিয়ালৰ

পাৰ্কিং লটত ৰখাই থোৱা এখন গাড়ীৰ পৰা উদ্ধাৰ হৈছে দুই শিশু ভাতৃ-ভগ্নীৰ মৃতদেহ। শুকুৰবাৰে সন্ধিয়া বিহাৰৰ পাটনাৰ ইন্দ্ৰপুৰী পথত সংঘটিত হয় এই ঘটনা। আৰক্ষীয়ে জনোৱা মতে, দুয়োৰে শৰীৰত পোৰাৰ দাগ আছে।

আৰক্ষীৰ সূত্ৰ অনুসৰি, মৃত ভাতৃ-ভগ্নীৰ নাম হৈছে দীপক কুমাৰ (৫) আৰু লক্ষ্মী (৭)। শুকুৰবাৰে নিশা প্ৰায় ১২:৩০ বজাত পঢ়া-শুনাৰ বাবে ঘৰৰ ওচৰৰ গৃহ শিক্ষয়িত্ৰীৰ ঘৰলৈ গৈছিল।

কিন্তু সময় পাৰ হৈ যোৱাৰ পাছতো ঘৰলৈ উভতি নহাত মাতৃ কিৰণ দেৱীয়ে আবেলি প্ৰায় ৪ বজাত গৃহ শিক্ষয়িত্ৰীক ফোন কৰে। মাতৃগৰাকীৰ মতে, শিক্ষয়িত্ৰীগৰাকীয়ে কয় যে দুয়োজনেই বহু আগতেই তেওঁলোকৰ ঘৰৰ পৰা ওলাই গৈছিল।

কিৰণৰ এজাহাৰ পোৱাৰ পিছতে আৰক্ষীয়ে দুয়োজনক বিচাৰি তালাচী চলায়। সন্ধিয়া প্ৰায় ৭ বজাত দীপকৰ ঘৰৰ সমীপত ৰখাই থোৱা এখন গাড়ীৰ পৰা  ভাতৃ-ভগ্নীক উদ্ধাৰ কৰে।

আৰক্ষী অধীক্ষক মহম্মদ হাবিবুল্লাই জনোৱা মতে, উদ্ধাৰ কৰাৰ পিছতো ছোৱালীজনী জীয়াই আছিল। দুয়োকে স্থানীয় চিকিৎসালয়লৈ প্ৰেৰণ কৰা হয়। চিকিৎসকে দীপকক মৃত বুলি ঘোষণা কৰে। চিকিৎসাৰ সময়ত লক্ষ্মীৰো মৃত্যু হয়। দুয়োৰে মৃতদেহ মৰণোত্তৰ পৰীক্ষাৰ বাবে প্ৰেৰণ কৰা হৈছে।

আৰক্ষীয়ে জনোৱা মতে, কিৰণ দেৱীয়ে গৃহ শিক্ষয়িত্ৰীৰ অত্যাচাৰৰ বাবে সন্তানৰ মৃত্যু হোৱাৰ অভিযোগ উত্থাপন কৰিছে। মহিলাগৰাকীয়ে শিক্ষয়িত্ৰীগৰাকীৰ  বিৰুদ্ধে আৰক্ষীক এজাহাৰ দাখিল কৰিছে।

আৰক্ষীয়ে শিক্ষয়িত্ৰীগৰাকীৰ জেৰা অব্যাহত ৰাখিছে। যিখন গাড়ীৰ পৰা মৃতদেহ দুটা উদ্ধাৰ কৰা হৈছে সেই গাড়ীখনৰ মালিককো বিচাৰি থকা হৈছে।