ৰুষ্ট প্ৰকৃতি! উত্তৰাখণ্ডত ডাৱৰ বিস্ফোৰণ; চামোলি-ৰুদ্ৰপ্ৰয়াগত দুৰ্যোগ, ধ্বংসস্তুপত আৱদ্ধ বহু পৰিয়াল

উত্তৰাখণ্ডৰ ৰুদ্ৰপ্ৰয়াগ আৰু চামোলি জিলাত এক ভয়ংকৰ ডাৱৰ বিস্ফোৰণে দুৰ্যোগৰ সৃষ্টি কৰিছে। ধ্বংসাৱশেষত আবদ্ধ হৈ আছে কেইবাটাও পৰিয়াল, আহত হৈছে বহু লোক। ধ্বংসাৱশেষৰ তলত আবদ্ধ হৈ আছে বহু লোক। উত্তৰাখণ্ডৰ মুখ্যমন্ত্ৰী পূষ্কৰ সিং ধামীয়ে এই সন্দৰ্ভত পদক্ষেপ লোৱা বুলি জনায়।

ৰুদ্ৰপ্ৰয়াগৰ বাৰেত ধুংগাৰ টোক আৰু চামোলি জিলাৰ দেৱাল অঞ্চলত সংঘটিত হৈছে দুটা পৃথক ডাৱৰ বিস্ফোৰণ।

মুখ্যমন্ত্ৰীয়ে কয় যে স্থানীয় প্ৰশাসনে যুদ্ধকালীন ক্ষিপ্ৰতাৰে উদ্ধাৰ আৰু সাহায্য অভিযান চলাই আছে। তেওঁ নিজেই বিষয়টো চাই আছে আৰু বিষয়াসকলৰ সৈতে অহৰহ যোগাযোগত আছে। মুখ্যমন্ত্ৰীয়ে এক্স-এত লিখিছে, “সকলোৰে সুৰক্ষা আৰু সুস্থ স্বাস্থ্যৰ বাবে বাবা কেদাৰৰ ওচৰত প্ৰাৰ্থনা কৰিছো।”

যোৱা সপ্তাহৰ আৰম্ভণিতে চামোলিত ডাৱৰ বিস্ফোৰণ ঘটি থাৰালি অঞ্চলৰ পথ অৱৰুদ্ধ হৈ পৰে। টুনৰি গডেৰাৰ প্ৰবাহত জলপৃষ্ঠ বৃদ্ধি পোৱাৰ লগে লগে বোকা আৰু ধ্বংসাৱশেষ ভিতৰত সোমাই কেইবাটাও ঘৰৰ ক্ষতিসাধন কৰে।

চেপডো বজাৰ আৰু কোটদ্বীপ বজাৰতো ধ্বংসাৱশেষ সোমাই যায়। বোকাত আৱদ্ধ হৈ থকা গাড়ীৰ ছবিও পোহৰলৈ আহিছে।

ইফালে উত্তৰকাশীৰ হৰ্শিল উপত্যকাত যোৱা কেইদিনমানৰ পৰা সাহায্যৰ কাম চলি আছে। গডগাড গাডেৰাৰ পৰা নামি অহা ধ্বংসাৱশেষে যমুনা নদীত অস্থায়ী হ্ৰদৰ সৃষ্টি কৰি সেই অঞ্চলত গুৰুতৰ সমস্যাৰ সৃষ্টি কৰিছে।

জিলা দণ্ডাধীশ প্ৰশান্ত আৰ্য্যই সৰ্বভাৰতীয় সংবাদ সংস্থাৰ আগত কয়, “গংগোত্ৰী যাত্ৰা পথত কোনো সমস্যা নাই, আমি আশা কৰিছো যে এবাৰ পথ মেৰামতিৰ কাম সম্পূৰ্ণ হ’লে যমুনোত্ৰী যাত্ৰাও পুনৰ আৰম্ভ কৰিব পৰা যাব।”

একে সময়তে সমগ্ৰ ৰুদ্ৰপ্ৰয়াগ জিলাত এই দুৰ্যোগ গভীৰ হৈ পৰিছে। অলাকনন্দা আৰু মন্দাকিনী নদীৰ জলপৃষ্ঠ ক্ৰমাগতভাৱে বৃদ্ধি পাইছে। কেদাৰনাথ উপত্যকাৰ লাওৱাৰা গাঁৱৰ এটা পথৰ ওপৰেৰে নিৰ্মাণ কৰা এখন দলং প্ৰচণ্ড সোঁতে উটুৱাই লৈ যায়। চেনাগড় অঞ্চলতো পৰিস্থিতি সংকটজনক।

আৱাসিক এলেকাসমূহত প্ৰৱেশ কৰিছে নদীৰ পানী। ক্ষতিগ্ৰস্ত বাসগৃহৰ পৰা মানুহক খালী কৰিবলৈ বাধ্য হৈছে প্ৰশাসনে। ৰুদ্ৰপ্ৰয়াগৰ বিখ্যাত হনুমান মন্দিৰটোও পানীত বুৰ গৈছে।

আনহাতে, ৰুদ্ৰপ্ৰয়াগ জিলা দণ্ডাধীশ প্ৰীত জৈনে কয় যে বাসুকেদৰত অবিৰত ধাৰাসাৰ বৰষুণত চাৰিটা ঘৰ জাহ গৈছে। অৱশ্যে কোনো লোকৰ ক্ষতি হোৱা নাই, আটাইকেইজন বাসিন্দাক নিৰাপদে উলিয়াই অনা হৈছে। তেওঁ কয়, “আমি পৰিস্থিতিৰ ওপৰত তীক্ষ্ণ দৃষ্টি ৰাখিছো।”

ইফালে বতৰৰ সতৰ্কবাণী মনত ৰাখি প্ৰশাসনে আজি ৰুদ্ৰপ্ৰয়াগ, বাগেশ্বৰ, চামোলি, হৰিদ্বাৰ আৰু পিথোৰাগড় জিলাৰ সকলো বিদ্যালয় বন্ধ কৰাৰ নিৰ্দেশ জাৰি কৰিছে।

চলিত মাহৰ আৰম্ভণিতে ধৰালী অঞ্চলত সংঘটিত ডাৱৰ বিস্ফোৰণৰ ঘটনাত নিৰুদ্দেশ হৈছিল ১০০ৰো অধিক লোক। যদিও শেহতীয়াকৈ উত্তৰকাশী-হৰ্শিল পথ সংযোগ আংশিকভাৱে পুনৰুদ্ধাৰ কৰা হৈছে, তথাপিও গংগোত্ৰী তীৰ্থযাত্ৰা বন্ধ হৈ আছে। সীমান্ত পথ সংস্থাক জৰুৰী মেৰামতি কৰিবলৈ নিৰ্দেশ দিয়া হৈছে যাতে গংগোত্ৰী যাত্ৰা সম্পূৰ্ণৰূপে পুনৰ আৰম্ভ কৰিব পৰা যায়।