আইন-শৃংখলাক লৈ প্ৰশ্ন উত্থাপন, হাউলীত আৰক্ষীৰ বিৰুদ্ধে আন্দোলনৰ পথলৈ ৰাইজ

বৰপেটা জিলাৰ হাউলী থানাৰ অন্তৰ্গত দাবালীয়াপাৰাৰ মাছ ব্যৱসায়ী জাহিদুল ইছলাম নিৰুদ্দেশ হোৱাৰ এসপ্তাহ উকলি যোৱাৰ পিছতো আৰক্ষীয়ে কোনো শুংসূত্ৰ উলিয়াব নোৱৰাত আৰক্ষীৰ অমনোযোগিতাৰ বিৰুদ্ধে আন্দোলনৰ পথ লোৱাৰ সকীয়নি দিছে স্থানীয় ৰাইজে।

হাউলী থানাৰ ভূমিকাত অসন্তুষ্ট হৈ যুৱকজনৰ সন্ধান বিচাৰি পৰিয়াল আৰু অঞ্চলবাসীয়ে ৬ জুনত বৰপেটা আৰক্ষী অধীক্ষকক এক লিখিত অভিযোগো দাখিল কৰিছে।

উল্লেখযোগ্য যে যোৱা ৫ দিন ধৰি নিৰুদ্দেশ হৈ থকা হাউলীৰে আজাহাৰ আলী নামৰ এজন লোকৰ মৃতদেহো আজি ৭ জুনত উদ্ধাৰ হৈছে।

ঘটনাটো সন্দৰ্ভত হাউলী থানাত এজাহাৰ দাখিল কৰাৰ পিছত আৰক্ষীয়ে ধুবুৰী জিলাৰ নিত্য বজাৰৰ এজন দুধৰ্ষ ডকাইতক কৰায়ত্ত কৰিছে যদিও যুৱকজনৰ কোনো শুংসূত্ৰ উলিয়াব পৰা নাই।

অভিযোগ অনুসৰি দাবালীয়াপাৰাৰ আব্দুল মান্নানৰ পুত্ৰ জাহিদুল ইছলামে যোৱা  ৩০ মে’ৰ সন্ধিয়া প্ৰায় ৬-৩০ বজাত কদমগুৰি চকত ইফতাৰ কৰি দাবালীয়াপাৰা গাঁৱৰ আমিৰ হামজাইৰ সৈতে হাউলীলৈ যায়। হাউলী টাউনৰ বজাৰ মছজিদৰ সন্মুখত জাহিদুল আৰু আমিৰক ৰাইজে দেখা পাইছিল।

সন্ধিয়া প্ৰায় ৭-৪০ বজাত জাহিদুলে পত্নীৰ সৈতে ফোনযোগে কথা পতাৰ পিছৰ পৰাই জাহিদুল সন্ধানহীন হৈ আছে।

নিৰুদ্দিষ্ট ক্ষুদ্ৰ ব্যৱসায়ী জাহিদুল ইছলাম কণ কণ দুটি শিশুৰ পিতৃ।