কোনে নিউজ চেনেলৰ মালিকে গভীৰ নিশালৈ মদ খুৱাইছিল জুবিনক? প্ৰশ্ন এগৰাকী বিশেষ অনুৰাগীৰ

গণশিল্পী জুবিন গাৰ্গৰ অন্ত্যোষ্টিক্ৰিয়া সম্পন্ন হোৱাৰ পূৰ্বেই তেখেতৰ আকস্মিক মৃত্যুক লৈ পুনৰ সৃষ্টি হৈছে বিতৰ্কৰ। শেহতীয়াকৈ জুবিন গাৰ্গৰ দুৰ্ভাগ্যজনক মৃত্যুক লৈ সৃষ্টি হোৱা কিছু দিশক লৈ প্ৰশ্ন উত্থাপন কৰিছে ৰজত কমল বঁটা বিজয়ী প্ৰযোজক লুইত কুমাৰ বৰ্মনে।

সামাজিক মাধ্যম ফেচবুকত বৰ্মনে ‘ছিংগাপুৰত কোন নিউজ চেনেলৰ মালিকে য়াট বুক কৰিছিল? কোনে নিউজ চেনেলৰ মালিকে গভীৰ নিশালৈ মদ খুৱাইছিল? কোনে ছিংগাপুৰত থাকি গুৱাহাটীত থকা বুলি ফাকি মাৰিছে? আমি নাজানো বুলি ভাবিছে নেকি?’ বুলি প্ৰশ্ন উত্থাপন কৰিছে। আনকি সেই বিশেষ ছেটেলাইট চেনেলৰ স্বতাধিকাৰীৰ বিৰুদ্ধে এই প্ৰশ্ন অৱতাৰণা কৰা বাবে বৰ্মনৰ বিৰুদ্ধে নিলম্বিত অসম প্ৰশাসনিক সেৱাৰ বিষয়া নুপূৰ বৰাৰ পৰা উৎকোচ লোৱাৰ অভিযোগ কৰিছে বুলি লুইত কুমাৰ বৰ্মনে উল্লেখ কৰে।

আন এটা পোষ্টত আজি বৰ্মনে লিখে যে, ‘হাস্পতালত যেতিয়া ৰোগীৰ মৃত্যু হয়, ডক্টৰে লগালগ পৰিয়ালক খবৰ দিয়ে। পৰিয়ালৰ পৰা লগা লগ আন আত্মীয় আৰু বন্ধু বান্ধৱলৈ বাতৰিটো যায়। ৫ মিনিটো নালাগে খবৰ পাওঁতে। তেনে স্থলত জুবিনৰ মৃত্যুৰ খবৰটো অলপ দেৰিকৈ ৰাইজক জনোৱা হ’ল। কিয় দেৰি কৰিলে? লগালগ কিয় নজনালে? তাত অসমৰ সাংবাদদাতা আছিল, সংবাদ মাধ্যমৰ মালিক আছিল। তথাপিও কিয় দেৰি কৰালে খবৰটো দিওঁতে। নে এই গেগখিনিত কিবা মেনেজ কৰিলে? নে ছ’চিয়েল মেডিয়া আদিৰ পৰা ফটো, ভিডিও ডিলিট কৰিবলৈ সময় ল’লে। যাতে প্ৰমাণ একো নাথাকে!’

আনকি অসমৰ আন এজন জ্যেষ্ঠ সাংবাদিক অতনু ভূঞাই ২০ ছেপ্টেম্বৰত কয় যে, অসমৰ এজন মিডিয়া সম্ৰাট আৰু এজন মুখ্য সম্পাদকো ছিংগাপুৰলৈ গৈছিল। জুবিন গাৰ্গৰ মৃত্যুৰ আগদিনা ছিংগাপুৰত এজন ব্যৱসায়ীয়ে এটা নৈশ সুৰা পাৰ্টিৰ আয়োজন কৰিছিল, য’ত জুবিন গাৰ্গ উপস্থিত আছিল বুলিও ভূঞাই উল্লেখ কৰে। আনকি অতনু ভূঞাই পাৰ্টিৰ পিছদিনা আৰাম অবিহনে দীৰ্ঘদিনীয়া অসুস্থতা থকা বুলি জনা সত্বেও দিনত শোৱাৰ অভ্যাস থকা জুবিনক জাহাজৰ প্ৰমোদ ভ্ৰমণত লৈ গৈছিল বুলি উল্লেখ কৰে।

ইতিমধ্যে অসমৰ জনসাধাৰণে অসমৰ মূলসুঁতিৰ সংবাদ মাধ্যমৰ ওপৰত আস্থা প্ৰায় হেৰুৱাইছে। তেনে ক্ষেত্ৰত অসমীয়াৰ আবেগ জুবিনৰ মৃত্যুক লৈ কৰা ল’ৰাধেমালিক সহজভাৱে ল’ব পৰা নাই অসমৰ জনসাধাৰণে।