জয়পুৰৰ SMS হাস্পতালৰ ICUত অগ্নিকাণ্ড; ধোঁৱাত শ্বাসৰুদ্ধ হৈ ৬ ৰোগীৰ মৃত্যু, গুৰুতৰভাৱে আহত ৫ জন

ৰাজস্থানৰ জয়পুৰৰ স্বোৱাই মান সিং হাস্পতালত ভয়ংকৰ অগ্নিকাণ্ডৰ ঘটনা সংঘটিত হৈছে। ধোঁৱাত শ্বাসৰুদ্ধ হৈ আই চি ইউত থকা ৬ জন ৰোগীৰ মৃত্যু ঘটিছে। আন ৫ জন গুৰুতৰভাৱে আহত হৈছে।

সোমবাৰে পুৱতি নিশা সংঘটিত হয় এই দুৰ্ঘটনা। শ্বৰ্ট চাৰ্কিটৰ বাবেই এই অগ্নিকাণ্ড সংঘটিত হোৱা বুলি সন্দেহ কৰিছে চিকিৎসালয় কৰ্তৃপক্ষই। ঘটনাস্থলীত উপস্থিত হৈছে অগ্নিনিৰ্বাপক বাহিনী। জুই নিৰ্বাপনৰ চেষ্টা কৰা হৈছে।

চিকিৎসালয়খনৰ ট্ৰমা চেণ্টাৰৰ মুৰব্বী চিকিৎসক অনুৰাগ ঢাকৰে জানিবলৈ দিয়া মতে, আই চি ইউৰ ভিতৰত শ্বৰ্ট চাৰ্কিটৰ ফলত জুই লাগে। কিছু মুহূৰ্তৰ ভিতৰতে জুই দ্বিতীয় মহলালৈ বিয়পি পৰে। সমগ্ৰ ৱাৰ্ডটো বিষাক্ত ধোঁৱাই আৱৰি ধৰে। তেওঁ কয়, “ট্ৰমা চেণ্টাৰৰ দ্বিতীয় মহলাত দুটা আই চি ইউ আছে। ট্ৰমা আই চি ইউত ১১ জন আৰু ছেমি আই চি ইউত ১৩ জন ৰোগী ভৰ্তি হৈ আছিল।”

জুই বিয়পি পৰাৰ লগে লগে হুলস্থুলৰ সৃষ্টি হয়। ৰোগীসকলৰ আত্মীয়ই আতংকিত হৈ চিঞৰিবলৈ ধৰে। নাৰ্ছ, ৱাৰ্ড বয় আৰু ট্ৰমা চেণ্টাৰৰ কৰ্মচাৰীয়ে একেলগে মিলি ৰোগীসকলক ট্ৰলী আৰু ষ্ট্ৰেচাৰত উলিয়াই আনিছিল। ট্ৰমা আই চি ইউত থকা বেছিভাগ ৰোগীয়েই গভীৰ অচেতন অৱস্থাত আছিল।

ডাক্তৰ অনুৰাগ ঢাকৰৰ ভাষাত, “সেই মুহূৰ্তত আমি যিমান পাৰো সিমান মানুহক উলিয়াই আনিলোঁ। কিন্তু ৬ জনৰ অৱস্থা অতি সংকটজনক আছিল। চিকিৎসক আৰু নাৰ্চে চিপিআৰেৰে তেওঁলোকৰ জীৱন বচাবলৈ চেষ্টা কৰিছিল। কিন্তু শেষত সেয়া সম্ভৱ নহ’ল।” চিকিৎসালয়ৰ সূত্ৰ অনুসৰি মৃতসকলৰ ভিতৰত ৪ জন পুৰুষ আৰু ২ গৰাকী মহিলাও আছে।

সম্প্ৰতি নিয়ন্ত্ৰিত হৈছে অগ্নিকাণ্ড। চিকিৎসক আৰু অগ্নিনিৰ্বাপক বাহিনীয়ে কয় যে সময়মতে জুই নিৰ্বাপিত নহ’লে পৰিস্থিতি আৰু ভয়ংকৰ হ’লহেঁতেন। ঘটনাৰ পিছতে চিকিৎসালয়খনৰ বিদ্যুৎ যোগান সাময়িকভাৱে বিচ্ছিন্ন হৈ পৰে। ঘটনা সন্দৰ্ভত আৰক্ষীয়ে তদন্ত আৰম্ভ কৰিছে।