‘ৰৈ ৰৈ বিনালে’ ছবিৰ প্ৰচাৰক লৈ বিশেষ পৰিকল্পনা আছিল জুবিন গাৰ্গৰ! এই সন্দৰ্ভত কি ক’লে পৰিচালক ৰাজেশ ভূঞাই 

জুবিন গাৰ্গৰ শেষ ছবি ‘ৰৈ ৰৈ বিনালে’ৰ পৰা শেখৰজ্যোতি গোস্বামী, অমৃতপ্ৰভা মহন্ত আৰু মেনেজাৰ সিদ্ধাৰ্থ শৰ্মাৰ নাম আৰু দৃশ্যাংশ আঁতৰোৱা হ’ব। ৰাইজৰ দাবীৰ প্ৰতি সঁহাৰি জনাই ছবিখনৰ পৰিচালক ৰাজেশ ভূঞাই এই সিদ্ধান্ত গ্ৰহণ কৰিছে। ৩১ অক্টোবৰত মুক্তি লাভ কৰিবলগীয়া এই ছবিখনত অভিনয়ৰ লগতে প্ৰযোজনাও কৰিছিল জুবিন গাৰ্গে। ইতিমধ্যে মহানগৰীৰ ৰয়েল গ্ল’বেল ইউনিভাৰ্চিটিত ছবিখনৰ শেষৰটো দৃশ্যগ্ৰহণ সম্পন্ন কৰিছে।

ছবিখনৰ লগত সিদ্ধাৰ্থ শৰ্মা, শেখৰজ্যোতি গোস্বামী আৰু অমৃতপ্ৰভা মহন্তৰ নাম সাঙোৰ খাই থকাৰ বাবে অসমৰ ৰাইজে বিভিন্ন মন্তব্য প্ৰকাশ কৰিছে। তেনে পৰিস্থিতিত মঙলবাৰে মুক্তিলাভ কৰা ছবিখনৰ প্ৰথম গীত ‘মোৰ মন’ত শেখৰজ্যোতি গোস্বামীকো এটা অংশত দেখা গৈছিল, ইয়াৰ পাছতে বহুতে ছবিখনৰ পৰা এই তিনিওগৰাকীৰ দৃশ্যবোৰ আঁতৰোৱাৰ দাবী জনাইছিল। ৰাইজৰ বিপুল দাবীৰ প্ৰতি সঁহাৰি জনাই নিৰ্মাতা গোষ্ঠীয়ে ছবিখনৰ পৰা এই তিনিওগৰাকী থকা দৃশ্যাংশ আঁতৰোৱাৰ সিদ্ধান্ত লৈছে।

পৰিচালক ৰাজেশ ভূঞাই কয় যে, “জুবিন গাৰ্গে তেওঁৰ ওচৰে-পাজৰে থকা মানুহখিনিক সকলোকে সমান দৃষ্টিৰে চাইছিল। সকলোকে তেওঁ সমান বুলি ভাবিছিল, ঠিক তেনেদৰে সিদ্ধাৰ্থ, শেখৰজ্যোতি, অমৃতপ্ৰভাকো নিজৰ বুলি ভাবিছিলে। আজি আমি সকলোৱে জুবিন গাৰ্গৰ ন্যায়ৰ বাবে যুঁজি আছো। সেইদিনাৰ ঘটনাটোৰ এতিয়াও প্ৰকৃত কাৰণ পোহৰলৈ নাই অহা। কি হ’ল তাৰ আমি উত্তৰ বিচাৰিছো। সেই উত্তৰ আমাক সিদ্ধাৰ্থ, শেখৰজ্যোতি, অমৃতপ্ৰভা কোনেও দিব নাই পৰা। গতিকে আমি প্ৰযোজক গোষ্ঠীৰ লগত আলোচনা কৰি এটা সিদ্ধান্তত উপনিত হৈছো, যিসকলে তেওঁক আমাৰ মাজৰ পৰা আঁতৰাই পঠিয়ালে, যিসকলে তেওঁক লৈ অৱহেলা কৰিলে তেনেকুৱা কিছুমান দানৱ দেৱতাতুল্য জুবিন গাৰ্গৰ লগত একেশাৰীত থাকিব নোৱাৰে, গতিকে তেওঁলোকৰ যিখিনি দৃশ্য আছিলে সেইখিনি আমি আঁতৰাই দিয়াৰ সিদ্ধান্ত লৈছো।”

উল্লেখ্য যে  ছিংগাপুৰ যাত্ৰাৰ পূৰ্বে জুবিন গাৰ্গে পৰিচালক ৰাজেশ ভূঞালৈ এটা টোকা লিখি দি গৈছিল। ই টিভি ভাৰতত প্ৰকাশিত এটা সাক্ষাৎকাৰত ভূঞাই কয় যে, “১৫ ছেপ্তেম্বৰত আমি ছবিখনৰ সম্পাদনাৰ কাম কৰি আছিলো। জুবিন গাৰ্গো তালৈ আহিছিল। তাতে ছবিখনৰ প্ৰচাৰৰ সন্দৰ্ভত আলোচনা কৰা হৈছিল। তেতিয়া জুবিন গাৰ্গে এই বাৰৰ বেলেগ ধৰণে  প্ৰচাৰ কৰিম বুলি উল্লেখ কৰিছিল। ভূঞাই উল্লেখ কৰা অনুসৰি জুবিন গাৰ্গে কৈছিল যে “সকলোৱে মোৰ ওচৰলৈ আহে অট’গ্ৰাফ বিচাৰি, মোৰ সন্নিধ্য বিচাৰি। সকলোকে যিহেতু একেসময়ে লগ কৰা সম্ভৱ নহয়, গতিকে এনেকুৱা এটা কাম কৰিম যাতে সকলোৱে মোৰ সান্নিধ্য লাভ কৰে। মই এটা অট’গ্ৰাফ দিম আৰু লগতে ৰাইজক ছবিখন চাবলৈ আহ্বান জনাম।” সেই আহ্বানটো এটা টোকা লিখি থৈ গৈছিল আৰু সেইখিনিয়ে আমাৰ মাজত থকা জুবিন গাৰ্গ শেষ হাতৰ আখৰ। টোকাটোৰ লগতে জুবিনৰ এখন ফটো থাকিব। জুবিনৰ ফটোসহ টোকাটো তেওঁৰ অনুৰাগী সকলৰ মাজত বিলাই দিয়া হ’ব। সেইখিনিয়ে তেওঁ ইচ্ছা কৰিছিল। এনেদৰেই তেওঁ ছবিখনৰ প্ৰচাৰ কৰিব বিচাৰিছিল। আমিও এনেধৰণে ছবিখন মুক্তিৰ পূৰ্বে যিমান পাৰো ৰাইজৰ মাজত বিলাই দিম।”

ছবিখনৰ নিৰ্মাণ সন্দৰ্ভত ৰাজেশ ভূঞাই কয় যে, “ আমি ছবিখনৰ প্ৰায় অন্তিম পৰ্যায়ত আছো। বৰ্তমান ভিএফক্স, মিক্সিঙৰ লগতে সম্পাদনাৰ কাম চলি আছে। লগতে চাউণ্ড ডিজাইনিঙৰ কামো চলি আছে। জুবিন গাৰ্গে ৩১ অক্টোবৰত ছবিখন মুক্তি দিয়াৰ আশা কৰিছিল আমিও সেইটো হিচাপে আগবাঢ়িছো। ৩১ অক্টোবৰ তাৰিখে আমি ছবিখন ৰাইজৰ মাজত মুকলি কৰি দিবলৈ সক্ষম হ’ম।”

জুবিন গাৰ্গৰ এই ছবিক লৈ বহু সপোন আছিল। ভূঞাই আৰু কয় যে, “এই ছবিখনক লৈ জুবিন গাৰ্গৰ বহু আশা আছিলে। চকুত লেঞ্চ লগাই বহুত কষ্ট কৰি শ্বুটিং কৰিছিল। তিনিমাহ তেনেদৰে কষ্ট কৰিছিল। ৮-৯ ঘণ্টা চকুত লেঞ্চযোৰ পিন্ধি থাকে। কেতিয়াও কোনো দিন আপত্তি কৰা নাছিলে। অনবৰতে ছবিখনৰ কথা কৈ আছিল। এই ছবিখন প্ৰথমখন মিউজিকেল ছবি। কাহিনী জুবিনৰ নিজৰ আছিল। ছবিখনৰ ফাইনেল প্ৰডাকটো জুবিনে চাব নোৱাৰিলে সেইটো দুখ আমাৰ সদায় থাকি যাব।”

উল্লেখ্য যে, ছিংগাপুৰৰ পৰা অহাৰ পাছতে ছবিখনৰ ডাবিঙৰ কাম কৰাৰ কথা আছিল জুবিনে। তেওঁৰ ৰহস্যজনক মৃত্যুৰ পাছতে ডাবিঙকলৈ প্ৰশ্ন উত্থাপন হৈছিল যদিও পৰিচালকে জনোৱা মতে ছবিত সম্পূৰ্ণ জুবিন গাৰ্গৰে কণ্ঠ থাকিব। উন্নত প্ৰযুক্তিৰ সহায়ত ছবিখনত তেওঁৰ কণ্ঠই ব্যৱহাৰ কৰা হৈছে বুলি উল্লেখ কৰে।