কাজিৰঙাত বানপানীৰ সময়ত বন্যপ্ৰাণীৰ সুৰক্ষা সম্পৰ্কীয় দিনজোৰা কৰ্মশালা

বানপানীৰ প্ৰাক্‌ক্ষণত কাজিৰঙাৰ বন্যপ্ৰাণীৰ নিৰাপত্তা নিশ্চিত কৰাৰ বাবে সংঘবদ্ধভাৱে কাম কৰাৰ এক বিস্তৃত পৰিকল্পনাৰে কাজিৰঙাত আজি দিনজোৰা কাৰ্যসুচীৰে পশুচিকিৎসক সকলৰ এখন বিশেষ কৰ্মশালা অনুস্থিত হয় ৷ কাজিৰঙাৰ কহঁৰা ৰেঞ্জৰ বিভাগীয় প্ৰেক্ষাগৃত অনুষ্ঠিত এই কৰ্মশালাখন অনু্ঠিত হয়। কৰ্মশালাখন উদ্বোধন কৰে কাজিৰঙাৰ সঞ্চালক আকাশ দ্বীপ বৰুৱাই৷ দিনজোৰা এই কৰ্মশালাত কাজিৰঙা ৰাষ্ট্ৰীয় উদ্যানৰ গাতে লাগি থকা আটাইকেইখন জিলাৰ বিভাগীয় পশু চিকিৎসকসকলৰ উপৰিও কাজিৰঙা ৰাষ্ট্ৰীয় উদ্যানৰ পশু চিকিৎসক আৰু ৰাষ্ট্ৰীয় উদ্যানখনত কৰ্মৰত বিভিন্ন বেচৰকাৰী সন্থা সমুহৰ পশু চিকিৎসকসকলেও অংশ গ্ৰহণ কৰে ৷

কৰ্মশালাত খানাপাৰাৰ ৰাজ্যিক পশু চিকিৎসা মহাবিদ্যালয়ৰ বন্যপ্ৰাণী বিশেষজ্ঞ ডা৹ কুশল কুমাৰ শৰ্মা আৰু মহাবিদ্যালয়খনৰ পশুধন গৱেষণা বিভাগৰ সঞ্চালক ডা৹ অপূৰ্ব চক্ৰৱৰ্তী  উপস্থিত থাকে৷

কৰ্মশালা উদ্বোধন কৰি সঞ্চালক আকাশ দ্বীপ বৰুৱাই বন্যপ্ৰাণী সংৰক্ষণৰ বাবে অংশগ্ৰহণকাৰী পশুচিকিৎকসকলৰ জ্ঞান আৰু অভিজ্ঞতাক  কামত লগাই সকলোৱে সহযোগিতাৰে কাম কৰি যোৱাৰ বাবে আহ্বান জনায়৷ কাজিৰঙাত বানপানীৰ সময়ত বন্যপ্ৰাণীৰ সুৰক্ষাৰ বাবে সেৱা আগবঢ়াব পৰাকৈ বিভিন্ন দিহা পৰামৰ্শ আৰু অভিজ্ঞতা বিনিময়ৰ বাবে প্ৰধানকৈ আয়োজিত এই কৰ্মশালাত বিশ্ব প্ৰকৃতি নিধি,  ৱাইল্ড লাইফ ট্ৰাষ্ট অৱ ইণ্ডিয়াৰ বিশেষজ্ঞৰ উপৰিও কাজিৰঙাৰ গৱেষণা বিষয়া ৰবীন্দ্ৰ শৰ্মাই বন্যপ্ৰাণী সুৰক্ষাৰ বিষয়ত এই কৰ্মশালাত অংশগ্ৰহণকাৰী ফৰেনছিক বিশেষজ্ঞ পশুচিকিৎসকসকলৰ সৈতে মত বিনিময় কৰে ৷ অসমত প্ৰথম বাৰৰ বাবে আয়োজিত পশুচিকিৎসকসকলৰ এই কৰ্মশালাত দেশৰ আগশাৰীৰ প্ৰকৃতি সংগঠন ‘বিশ্ব প্ৰকৃতি নিধি’ আৰু ‘ৱাইল্ড লাইফ ট্ৰাষ্ট অৱ ইণ্ডিয়া’ই সহযোগিতা আগবঢ়ায় ৷ কৰ্মশালাৰ সামৰণিত কাজিৰঙাৰ ডি এফ অ ৰোহিনী বল্লভ শইকীয়াই সকলোকে ধন্যবাদ জ্ঞাপন কৰে ৷