শীঘ্ৰেই ভাৰতলৈ ভ্ৰমণ কৰিব নেতান্যাহু; নিৰাপত্তাজনিত উদ্বেগ নস্যাৎ

 ইজৰাইলৰ প্ৰধানমন্ত্ৰী বেঞ্জামিন নেতান্যাহুৱে নিৰাপত্তাজনিত কাৰণে প্ৰস্তাৱিত ভাৰত ভ্ৰমণ পিছুৱাই দিলে বুলি প্ৰকাশিত সংবাদ মাধ্যমৰ দাবী নস্যাৎ কৰিছে। মঙলবাৰে ইজৰাইলী মিডিয়াত জনোৱা হৈছে যে, নেতান্যাহুৱে ভাৰতৰ নিৰাপত্তা ব্যৱস্থাৰ ওপৰত ‘সম্পূৰ্ণ আস্থা’ প্ৰকাশ কৰিছে আৰু দুয়োপক্ষীয় আলোচনাৰ জৰিয়তে ভ্ৰমণৰ নতুন তাৰিখ নিৰ্ধাৰণ কৰা হৈছে।

ইজৰাইলৰ প্ৰধানমন্ত্ৰীৰ কাৰ্যালয়ে সামাজিক মাধ্যমত প্ৰকাশ কৰা অনুসৰি, “ভাৰতৰ সৈতে ইজৰাইলৰ বন্ধুত্ব অতি দৃঢ়”। লগতে উল্লেখ কৰিছে যে, “প্ৰধানমন্ত্ৰী মোদীৰ নেতৃত্বত ভাৰতৰ নিৰাপত্তা ব্যৱস্থাৰ ওপৰত প্ৰধানমন্ত্ৰীৰ সম্পূৰ্ণ আস্থা আছে আৰু ইতিমধ্যে নতুন ভ্ৰমণৰ তাৰিখৰ বিষয়ে আলোচনা চলি আছে।”

উল্লেখযোগ্য যে, ইয়াৰ পূৰ্বে কিছুমান ইজৰাইলী সংবাদপত্ৰই প্ৰকাশ কৰিছিল যে, ২০১৮ চনৰ পিছত চলিত বৰ্ষৰ ডিচেম্বৰ মাহত তেওঁ প্ৰথম আনুষ্ঠানিক ভাৰত ভ্ৰমণৰ পৰিকল্পনা কৰিছিল। কিন্তু শেহতীয়াকৈ দিল্লীত সংঘটিত সন্ত্ৰাসবাদী আক্ৰমণৰ পিছত নেতান্যাহুৱে নিৰাপত্তাজনিত কাৰণত ভ্ৰমণ পিছুৱাই দিয়ে বুলি বাতৰি প্ৰচাৰ হৈছিল।

পিটিআইৰ সূত্ৰ অনুসৰি, এই প্ৰতিবেদনসমূহ কল্পনাপ্ৰসূত তথা ‘বিভ্ৰান্তিকৰ’ বুলি কোৱা হৈছে। লগতে সূত্ৰই জনায় যে, নেতান্যাহুৰ ভ্ৰমণৰ বাবে দুয়োপক্ষৰ পাৰস্পৰিক সুবিধাজনক তাৰিখ নিৰ্ধাৰণৰ প্ৰচেষ্টা চলি আছে।