কাৰ্বি আংলঙৰ ঘটনাৰ আঁৰত থকা অভিসন্ধি বিচাৰি উলিওৱাৰ দাবী নৰ্থ-ইষ্ট ৱমেন ফ্ৰণ্টৰ

কাৰ্বি আংলংঙৰ নৃশংস, অমানৱীয় ঘটনাৰ আঁৰত কাৰ কি অভিসন্ধি আছে অসমৰ ৰাইজে জানিব বিচাৰিছে। চৰকাৰে তৎকালীনভাৱে এই ঘটনাৰ আঁৰত কাৰ কি অভিসন্ধি আছে সেয়া বিচাৰি উলিয়াই ৰাজহুৱা কৰিব লাগে আৰু দোষীক ফাষ্ট ট্ৰেক আদালতত বিচাৰ কৰি শাস্তি প্ৰদান কৰিব লাগে। এই দাবী নৰ্থ ইষ্ট  ৱ’মেন ফ্ৰণ্টৰ।

বৃহস্পতিবাৰে গুৱাহাটী প্ৰেছ ক্লাৱত আয়োজিত এক সংবাদমেলত এই দাবী উত্থাপন কৰি নৰ্থ ইষ্ট  ৱ’মেন ফ্ৰণ্টৰ সভানেত্ৰী ৰেখাৰাণী দাস বড়োৱে কয় যে চৰকাৰকে প্ৰশাসনক ৰাইজৰ ওচৰ চপাই অনাৰ কথা কয় যদিও প্ৰশাসন যে ৰাইজৰ পৰা বহু নিলগত আছে এই কথা কাৰ্বি আংলঙৰ ঘটনাই প্ৰমাণ কৰিছে।

তেওঁ লগতে আঙুলিয়াই দিয়ে যে ডকমকা আৰক্ষী থানাৰ পৰা মাত্ৰ ১৪ কিলোমিটাৰ আঁতৰত নীল-অভিৰ নৃশংস ঘটনা সংঘটিত হৈছে। তাৰ মানে পুলিচ প্ৰশাসনৰ সম্পূৰ্ণ গাফিলতি আছে। এনে পুলিচ প্ৰশাসনক বিশ্বাস কৰিব পাৰিনে? ৰাইজৰ মাজত এই প্ৰশ্ন উত্থাপন হৈছে বুলি সংবাদমেলত কয় সভানেত্ৰীগৰাকীয়ে।

দুৰ্ভাগ্যজনকভাৱে পাহৰীয়া জিলা দুখনৰ জনসাধাৰণে সৰ্বস্তৰত হোৱা দুৰ্নীতিৰ বাবে শিক্ষা-স্বাস্থ্যকে ধৰি প্ৰাথমিক সা-সুবিধাসমূহ উপযুক্তভাৱে লাভ নকৰাত চাৰিওফালে অনগ্ৰসৰতা, কু-সংস্কাৰ, অন্ধবিশ্বাস বিৰাজ কৰিছে বুলি মন্তৱ্য কৰি ইয়াৰ বাবেই এনেধৰণৰ উৰাবাতৰি আদিয়ে ৰাইজক বিভ্ৰান্ত কৰা বুলি কয়।

আনহাতে, কাৰ্বি আংলঙৰ এই ঘটনাই যাতে জাতীয় অস্তিত্ব, ভাষাৰ অস্তিত্ব আদি বিষয়বোৰৰ পৰা নিলগাই ৰাখিব নোৱাৰে তাৰ বাবে আহ্বান জনাইছে সভানেত্ৰী ৰেখাৰাণী দাস বড়োৱে।

সভানেত্ৰীগৰাকীয়ে নাগৰিকত্ব সংশোধনী বিধেয়ক ২০১৬’ ৰ বিৰোধিতাৰে ফ্ৰণ্টে চলাই অহা গণস্বাক্ষৰ অভিযানৰ অংশ হিচাপে অহা ১৭জুনত ধুবুৰীত ভাৰত-বাংলা সীমান্তত গণস্বাক্ষৰ সংগ্ৰহ কৰা হ’ব বুলি সংবাদমেলত সদৰী কৰে।

সংবাদমেলখনত নৰ্থ ইষ্ট  ৱ’মেন ফ্ৰণ্টৰ উপ-সভানেত্ৰী সুমিত্ৰা হাজৰিকা, সম্পাদিকা মীৰা বৰঠাকুৰ, জোনমণি খাউণ্ড আদি উপস্থিত থাকে।