গণৰাজ্য দিৱসত পতাকা উত্তোলন কৰি ওলোটাকৈ থিয় হৈ চেলুট! বিতৰ্কত আই এ এছ টপাৰ টিনা, ভিডিঅ’ ভাইৰেল

২০১৫ চনৰ অসামৰিক সেৱাৰ পৰীক্ষাত প্ৰথম স্থান লাভ কৰি সমগ্ৰ দেশতে আলোড়ণ সৃষ্টি কৰিছিল তেওঁ। সেই পৰীক্ষাত দলিত ছোৱালী এজনীয়ে প্ৰথমবাৰৰ বাবে শীৰ্ষস্থান দখল কৰিছিল। দিল্লীৰ লেডী শ্ৰীৰাম কলেজৰ এগৰাকী ছাত্ৰী এই কঠিন পৰীক্ষাত প্ৰথম প্ৰচেষ্টাতে সফল হয়।

সেই আই এ এছৰ টপাৰ টিনা ডাবি এতিয়া বিতৰ্কৰ মাজত। সোমবাৰে গণৰাজ্য দিৱসত পতাকা উত্তোলন কৰাৰ পিছত ওলোটাকৈ থিয় হৈ চেলুট দিলে তেওঁ। এই ভিডিঅ’টো ছ’চিয়েল মিডিয়াত ভাইৰেল হৈ পৰে।

ভাইৰেল ভিডিঅ’টোত টিনাই গণৰাজ্য দিৱস উপলক্ষে পতাকা উত্তোলন কৰা দেখা গৈছে। প্ৰক্ৰিয়া শেষ হোৱাৰ লগে লগে তেওঁ সম্পূৰ্ণ ওলোটা হৈ ভাৰতৰ জাতীয় পতাকাক চেলুট দিলে। টিনাৰ ঘটনাৰ ভিডিঅ’ ছ’চিয়েল মিডিয়াত ভাইৰেল হোৱাৰ লগে লগে সমালোচনাৰ জোৱাৰ উঠে।

এজন নেটিজেনে লিখিছে, ‘আই এ এছ টিনা বৰ্তমান ৰাজস্থানৰ বাৰ্মেৰত কৰ্মৰত। ২০১৫ চনত অসামৰিক সেৱাৰ পৰীক্ষাত শীৰ্ষস্থান দখল কৰিছিল। কিন্তু জাতীয় পতাকা উত্তোলন কৰিব নাজানে। কোনোবাই অসামৰিক সেৱাৰ পৰীক্ষাত প্ৰথম স্থান লাভ কৰি ভেম দেখুৱালে এনেকুৱাই হয়।’

আন এজন নেটিজেনে লিখিছে, ‘IAS বিষয়া টিনা ভিডিঅ’ বনোৱাত ব্যস্ত। পতাকা উত্তোলন কৰি কাক চেলুট কৰিব তেওঁ নাজানে। এনে লোকৰ বাবে পৰীক্ষাত উত্তীৰ্ণ হোৱাটো এক কৃতিত্ব। সিহঁতে আৰু বাকী একো নাজানে।’