মাত্ৰ ২০ টকা উৎকোচৰ অভিযোগত জেইল! ৩০ বছৰীয়া আইনী যুঁজত নিৰ্দোষী প্ৰমাণিত হোৱাৰ পিছদিনাই মৃত্যু

ইয়াকেই আমি ভাগ্যৰ পৰিহাস বুলি কওঁ! মাত্ৰ ২০ টকা উৎকোচ লোৱাৰ অভিযোগ উঠিছিল গুজৰাটৰ আৰক্ষী কনিষ্টবল বাবুভাই প্ৰজাপতিৰ বিৰুদ্ধে। নিজকে নিৰ্দোষী বুলি প্ৰমাণ কৰিবলৈ তেওঁ ৩০ বছৰ ধৰি আইনী যুঁজ চলাইছিল।

যোৱা ৪ ফেব্ৰুৱাৰীত উচ্চ ন্যায়ালয়ে তেওঁক নিৰ্দোষী ঘোষণা কৰে। কিন্তু বদনাম আঁতৰিলেও আইনী যুঁজত ভাগৰি পৰা তেওঁৰ শৰীৰে আৰু তেওঁক সংগ দিব নোৱাৰিলে। ঠিক পিছদিনাই মৃত্যুৰ কোলাত ঢলি পৰে প্ৰাক্তন আৰক্ষী কনিষ্টবলগৰাকী।

বাবুভাইয়ে নিশ্চয় নিজৰ নিয়তি আগতেই অনুমান কৰিছিল! আদালতৰ পৰা সকাহ পোৱাৰ পিছত তেওঁ কয়, ‘মই এটা ডাঙৰ বোজা কঢ়িয়াই লৈ ফুৰিছিলো। অৱশেষত মোৰ কান্ধৰ পৰা সেয়া নামিল। এইবাৰ ভগৱানে মোক লৈ গ’লেও মোৰ কোনো আক্ষেপ নাই।’

১৯৯৬ চনত আহমেদাবাদত আৰক্ষী কনিষ্টবল হিচাপে কৰ্মৰত প্ৰজাপতিৰ বিৰুদ্ধে ২০ টকা উৎকোচ লোৱাৰ অভিযোগ উত্থাপন হৈছিল। সেই ভিত্তিত তদন্ত আৰম্ভ হৈছিল। দুৰ্নীতি প্ৰতিৰোধ আইনৰ অধীনত গোচৰ ৰুজু কৰা হৈছিল।

পিছৰ বছৰত সত্ৰ আদালতত অভিযোগনামা দাখিল কৰা হয়। দীৰ্ঘদিনীয়া যুক্তি-তৰ্কৰ অন্তত আদালতে প্ৰজাপতিক দোষী সাব্যস্ত কৰে। ন্যায়াধীশগৰাকীয়ে চাৰি বছৰৰ কাৰাদণ্ড আৰু ৩ হাজাৰ টকা জৰিমনা বিহাৰ নিৰ্দেশ দিয়ে।

এই ৰায়ৰ বিৰুদ্ধে গুজৰাট উচ্চ ন্যায়ালয়ৰ কাষ চাপিছিল কাৰাবন্দী প্ৰজাপতিয়ে। তাত ২২ বছৰ ধৰি গোচৰটো বিচাৰাধীন হৈ আছিল। তেওঁৰ অধিবক্তা নীতিন গান্ধীয়ে আদালতত কয় যে সমগ্ৰ গোচৰটো সন্দেহৰ ভিত্তিত সজোৱা হৈছে। অৱশেষত ৪ ফেব্ৰুৱাৰীত উচ্চ ন্যায়ালয়ে ৰায় দিয়ে। বিচাৰকসকলে কয় যে প্ৰজাপতি নিৰ্দোষী।

৩০ বছৰীয়া দীঘলীয়া আইনী যুঁজত জয়ী হৈ তেওঁ আৱেগিক হৈ পৰিছিল। তাৰ পিছত তেওঁ নিজৰ অধিবক্তাক ধন্যবাদ জনাই ঘৰলৈ উভতি আহিল। অৱশ্যে সেই আনন্দ বেছি দিন নাথাকিল। পিছদিনাই তেওঁৰ মৃত্যু হয়।

প্ৰজাপতিৰ অধিবক্তাইও অনুশোচনামূলক সুৰত কৈছিল যে কালি তেওঁক অফিচত লগ কৰিবলৈ আহিছিল। তেওঁ বৰ আনন্দত আছিল। চৰকাৰী চাকৰিৰ কোনো সুযোগ-সুবিধাই তেওঁ নাপালে। মইও তেওঁক সেইবোৰৰ বাবে আবেদন কৰিবলৈ পৰামৰ্শ দিও। কিন্তু ফোন কৰিয়েই হাৰ্ট এটেকৰ বাবে তেওঁৰ মৃত্যুৰ খবৰটো জানিব পাৰিছো।