হিমন্তৰ ‘শ্বুটিং’ ভিডিঅ’ বিতৰ্ক; ঘৃণামূলক ভাষণৰ অভিযোগত উচ্চতম ন্যায়ালয়ত সমাজকৰ্মীৰ দল

মুখ্যমন্ত্ৰী হিমন্ত বিশ্ব শৰ্মাৰ বিতৰ্কিত ভিডিঅ’ক লৈ এতিয়া দেশৰ শীৰ্ষ আদালতৰ কাষ চাপিছে বিশিষ্ট সমাজকৰ্মীৰ এটা দল। এই ভিডিঅ’টো বিজেপিৰ ছ’চিয়েল মিডিয়া হেণ্ডেলত শ্বেয়াৰ কৰা হৈছিল। পিছত ইয়াক ডিলিট কৰা হয় ।

 ভিডিঅ’টোত মুখ্যমন্ত্ৰী হিমন্ত বিশ্ব শৰ্মাই পইণ্ট ব্লেংক ৰেঞ্জৰ পৰা দাড়ি আৰু টুপী পিন্ধা এজন লোকক গুলীচালনা কৰা দেখা গৈছে। অভিযোগ কৰা হৈছে যে এই ভিডিঅ’ আৰু মুখ্যমন্ত্রীৰ বিভিন্ন মন্তব্যই সংখ্যালঘু জনগোষ্ঠীৰ বিৰুদ্ধে ঘৃণা বিয়পাইছে৷

প্ৰাক্তন উপ-ৰাজ্যপাল নজিব জঙৰ উপৰিও ৰূপৰেখা বাৰ্মা আৰু জন দয়ালকে ধৰি মুঠ ১২ জন সমাজ কৰ্মীয়ে এই জনস্বাৰ্থৰ গোচৰ ৰুজু কৰিছে। আৱেদনখনত উল্লেখ কৰা হৈছে যে মুখ্যমন্ত্রীৰ দৰে সাংবিধানিক পদত অধিষ্ঠিত হৈ তেওঁ ‘মিয়া মুছলিম’, ‘বান জেহাদ’ৰ দৰে মন্তব্য কৰি বা বিশেষ জনগোষ্ঠীৰ নাম ভোটাৰ তালিকাৰ পৰা বাদ দিয়াৰ দৰে মন্তব্য কৰি সাংবিধানিক শপত উলংঘা কৰিছে৷

গোচৰটোত কেৱল অসমৰ মুখ্যমন্ত্ৰীৰ উদ্ধৃতি দিয়াই নহয়, উত্তৰ প্ৰদেশৰ মুখ্যমন্ত্ৰী যোগী আদিত্যনাথৰ ‘কাঠমুল্লা’ মন্তব্য, উত্তৰাখণ্ডৰ মুখ্যমন্ত্ৰী পুষ্কৰ সিং ধামীৰ বিভিন্ন বক্তব্য আৰু মহাৰাষ্ট্ৰৰ মন্ত্ৰী নীতিশ ৰানেৰ বিভিন্ন বিতৰ্কিত বক্তব্যও উল্লেখ কৰা হৈছে।

আনকি এই আবেদনত ৰাষ্ট্ৰীয় নিৰাপত্তা উপদেষ্টা অজিত ডোভালৰ নামো জড়িত কৰা হৈছে। উচ্চ পদবীত থকা লোকৰ এনে বিভাজনমূলক মন্তব্যৰ বাবে দেশৰ গণতান্ত্ৰিক আন্তঃগাঁথনি বিপদত পৰা বুলি আবেদনকাৰীৰ দাবী। এই সন্দৰ্ভত উচ্চতম ন্যায়ালয়ে কি ব্যৱস্থা গ্ৰহণ কৰে সেয়া এতিয়া ৰাজনৈতিক মহলে লক্ষ্য ৰাখিছে।