কাৰাগাৰত বন্দী পাক ক্ৰিকেটাৰ ইমৰাণ খানৰ দৃষ্টিশক্তি প্ৰায় হেৰাই যোৱাৰ উপক্ৰমঃ চাঞ্চল্যকৰ দাবী পুত্ৰৰ

পাকিস্তানৰ প্ৰাক্তন প্ৰধানমন্ত্ৰী ইমৰাণ খানৰ স্বাস্থ্যক লৈ বৰ্তমান তীব্ৰ চাঞ্চল্যৰ সৃষ্টি হৈছে। পাকিস্তানৰ আদিয়ালা কাৰাগাৰত বন্দী হৈ থকা ইমৰাণ খানৰ স্বাস্থ্যৰ গুৰুতৰ অৱনতি ঘটা বুলি তেওঁৰ পুত্ৰ কাছিম খানে এক ডাঙৰ অভিযোগ উত্থাপন কৰিছে। কাছিমৰ মতে, দীৰ্ঘদিন ধৰি একাকী কাৰাবন্দী কৰি ৰখা আৰু সঠিক চিকিৎসাৰ অভাৱৰ বাবে তেওঁৰ পিতৃৰ এটা চকুৰ দৃষ্টিশক্তি প্ৰায় নাইকিয়া হৈ পৰিছে। ইমৰাণ খানে বৰ্তমান নিজৰ সোঁ চকুৰে মাত্ৰ ১৫ শতাংশহে দেখা পাইছে বুলি তেওঁৰ পুত্ৰই সামাজিক মাধ্যমত উল্লেখ কৰিছে।

ইমৰাণ খানৰ এই শাৰীৰিক অৱস্থাৰ বাবে তেওঁৰ পুত্ৰই দেশৰ বৰ্তমানৰ চৰকাৰ আৰু সামৰিক নেতৃত্বক প্ৰত্যক্ষভাৱে দায়ী কৰিছে। কাছিম খানে অভিযোগ কৰিছে যে এয়া কোনো আকস্মিক ঘটনা নহয়, বৰঞ্চ ৯২২ দিন ধৰি কৰা মানসিক আৰু শাৰীৰিক নিৰ্যাতনৰ এক পৰিণতি। তেওঁ সেনা প্ৰধান অসীম মুনিৰ আৰু প্ৰধানমন্ত্ৰী শ্বেহবাজ শ্বৰীফৰ বিৰুদ্ধে ক্ষোভ উজাৰি কয় যে এই সকলোবোৰ কাৰাগাৰ কৰ্তৃপক্ষৰ অবহেলা আৰু শাসনত থকা লোকসকলৰ নিৰ্দেশতে ঘটিছে। তেওঁৰ মতে, ইমৰাণ খানক উচিত চিকিৎসা আৰু তেজৰ পৰীক্ষাৰ পৰাও বঞ্চিত কৰা হৈছে।

আনহাতে ইমৰাণ খানৰ দুই পুত্ৰ বৰ্তমান ব্ৰিটেইনত থাকে আৰু তেওঁলোকে জনোৱা মতে তেওঁলোকক পিতৃক দেখা কৰিবলৈ পাকিস্তান চৰকাৰে ভিছা প্ৰদান কৰা নাই। কাছিমে আন্তঃৰাষ্ট্ৰীয় মানৱ অধিকাৰ সংস্থাসমূহক এই বিষয়ত হস্তক্ষেপ কৰিবলৈ আহ্বান জনাইছে। তেওঁ কয় যে ইমৰাণ খানৰ বিৰুদ্ধে যি ব্যৱস্থা লোৱা হৈছে সেয়া গণতন্ত্ৰৰ পৰিপন্থী আৰু ইয়াৰ বাবে দায়ীসকলে এদিন পৰিণতি ভোগ কৰিব লাগিব। ইয়াৰ মাজতে খাইবাৰ পাখতুনখোৱাৰ মুখ্যমন্ত্ৰী সোহেইল আফ্ৰিদীয়েও এই ঘটনাক চৰকাৰৰ ঘোৰ গাফিলতি বুলি গৰিহণা দিছে।

প্ৰাক্তন ক্ৰিকেটাৰ তথা ৰাজনীতিবিদগৰাকী ২০২৩ চনৰ পৰাই দুৰ্নীতিৰ বিভিন্ন গোচৰত কাৰাগাৰত বন্দী হৈ আছে। যদিও চৰকাৰে সকলো আইনী প্ৰক্ৰিয়া অনুসৰণ কৰা বুলি দাবী কৰিছে, পিটিআই সমৰ্থকসকলে ইয়াক ৰাজনৈতিক ষড়যন্ত্ৰ বুলি অভিহিত কৰিছে। শেহতীয়াকৈ ইছলামবাগ উচ্চ ন্যায়ালয়ে ১৬ ফেব্ৰুৱাৰীৰ ভিতৰত ইমৰাণ খানৰ এক বিশদ চিকিৎসা পৰীক্ষাৰ নিৰ্দেশ দিছে। বৰ্তমান সমগ্ৰ পাকিস্তানতে ইমৰাণ খানৰ স্বাস্থ্যক লৈ এক উত্তেজনাপূৰ্ণ পৰিৱেশৰ সৃষ্টি হৈছে।