দেশত ভয়াৱহ ৰূপ লৈছে চাইবাৰ অপৰাধে: জালিয়াতিৰ লক্ষ্য হৈ পৰিছিল স্বয়ং মুখ্য ন্যায়াধীশ সূৰ্য কান্ত

ভাৰতৰ উচ্চতম ন্যায়ালয়ৰ ন্যায়াধীশ সূৰ্য কান্তে শুকুৰবাৰে দেশত দ্ৰুতগতিত বৃদ্ধি পোৱা চাইবাৰ অপৰাধৰ ভাবুকিক লৈ গভীৰ উদ্বেগ প্ৰকাশ কৰে। জয়পুৰত অনুষ্ঠিত তিনিদিনীয়া চাইবাৰ নিৰাপত্তা আলোচনা চক্ৰৰ উদ্বোধনী অনুষ্ঠানত ভাষণ প্ৰদান কৰি তেওঁ সদৰী কৰে যে তেওঁ নিজেও চাইবাৰ অপৰাধীৰ লক্ষ্য হৈ পৰিছিল। তেওঁৰ পৰিচয় ব্যৱহাৰ কৰি ভুৱা ৱেবছাইট মুকলি কৰাৰ লগতে তাৰ পৰা বিভিন্ন ব্যক্তিলৈ বাৰ্তাও প্ৰেৰণ কৰা হৈছিল। অৱশ্যে লগে লগে চাইবাৰ কৰ্তৃপক্ষক বিষয়টো অৱগত কৰাত এই ৱেবছাইটসমূহ নাইজেৰিয়াৰ দৰে দেশৰ পৰা পৰিচালনা কৰা হৈছিল বুলি পোহৰলৈ আহিছে। ইয়াৰ জৰিয়তে চাইবাৰ অপৰাধৰ আন্তঃৰাষ্ট্ৰীয় পৰিসৰ, জটিলতা আৰু ইয়াৰ যে কোনো ভৌগোলিক সীমাৱদ্ধতা নাই, সেই কথা স্পষ্ট হৈ পৰে বুলি তেওঁ উল্লেখ কৰে।

ন্যায়াধীশ সূৰ্য কান্তে কৃত্ৰিম বুদ্ধিমত্তাক ন্যায় প্ৰক্ৰিয়া সহজলভ্য কৰাৰ ক্ষেত্ৰত এক যুগান্তকাৰী পৰিৱৰ্তন বুলি অভিহিত কৰে। কিন্তু একে সময়তে তেওঁ সকীয়াই দিয়ে যে চাইবাৰ অপৰাধ বৰ্তমান কেৱল বিত্তীয় প্ৰৱঞ্চনাৰ মাজতে আৱদ্ধ থকা নাই; ই জনসাধাৰণৰ বিশ্বাসৰ প্ৰতিও তীব্ৰ ভাবুকি কঢ়িয়াই আনিছে। সমগ্ৰ দেশত বৰ্তমান প্ৰায় ৬৬ লাখ (৬.৬ নিযুত) চাইবাৰ অপৰাধৰ গোচৰ অমীমাংসিত অৱস্থাত আছে বুলি উল্লেখ কৰে।

এটা শেহতীয়া ‘ডিজিটেল গ্ৰেপ্তাৰ’ গোচৰৰ প্ৰসংগ উল্লেখ কৰি তেওঁ কয় যে এহাল বৃদ্ধ দম্পতীয়ে মাত্ৰ কেইমিনিটমানৰ ভিতৰতে নিজৰ জীৱনজোৰা সঞ্চয় হেৰুৱাবলগীয়া হৈছিল। ন্যায়ালয়ে এই বিষয়টো নিজাকৈ ব্যৱস্থা গ্ৰহণ কৰিছে বুলি। তেওঁ কয় যে চাইবাৰ অপৰাধীয়ে দেশৰ সাধাৰণ নাগৰিকৰ পৰা প্ৰায় ৫৫,০০০ কোটি টকা লুটি নিছে, যিটো ধনদাবী আৰু ডকাইতিৰ স্পষ্ট উদাহৰণ।

অনুষ্ঠানটোত উপস্থিত থকা ৰাজস্থানৰ মুখ্যমন্ত্ৰী ভজন লাল শৰ্মাই ৰাজ্য চৰকাৰ চাইবাৰ অপৰাধৰ মোকাবিলা কৰিবলৈ দায়বদ্ধ বুলি প্ৰকাশ কৰে। ডিজিটেল অপৰাধৰ বিৰুদ্ধে ব্যৱস্থা সুদৃঢ় কৰিবলৈ তেওঁ এখন বিশেষ চাইবাৰ আদালত স্থাপনৰ কথা ঘোষণা কৰাৰ লগতে অপৰাধীয়ে নিশ্চিতভাৱে শাস্তি পাব বুলিও দৃঢ়তা প্ৰকাশ কৰে।