প্ৰাক্তন কেন্দ্ৰীয় মন্ত্ৰী মুকুল ৰায়ৰ মৃত্যু; ৰাজনৈতিক মহলত শোকৰ ছাঁ

প্ৰাক্তন কেন্দ্ৰীয় মন্ত্ৰী মুকুল ৰায়ৰ পৰলোকপ্ৰাপ্তি ঘটিছে। তেওঁৰ বয়স আছিল ৭৩ বছৰ। বহুদিন ধৰি তেওঁ অসুস্থ হৈ আছিল। কলকাতাৰ নিউ টাউনৰ এখন চিকিৎসালয়ত ভৰ্তি কৰোৱা হৈছিল জ্যেষ্ঠ ৰাজনৈতিক নেতাজনক। দেওবাৰে মাজ নিশা শেষ নিশ্বাস ত্যাগ কৰে। তেওঁৰ মৃত্যুৱে ৰাজনৈতিক মহলত শোকৰ ছাঁ পেলাইছে।

মুকুল ৰায়ৰ মৃত্যুৰ খবৰ পোৱাৰ পিছত তেওঁৰ অনুগামীসকলে চিকিৎসালয়খনৰ সন্মুখত সমবেত হয়। বহুতে ছ’চিয়েল মিডিয়াত শোক প্ৰকাশ কৰিছে।

মুকুল ৰায় এসময়ত তৃণমূল কংগ্ৰেছৰ ‘ছেকেণ্ড ইন কমাণ্ড’ হিচাপে পৰিচিত আছিল। ১৯৯৮ চনত তৃণমূল কংগ্ৰেছ গঠন হোৱাৰ পিছত তেওঁ দলটোৰ সৰ্বভাৰতীয় সাধাৰণ সম্পাদক হয়। ৰাজ্যসভাৰ পৰাও সাংসদ হিচাপে নিৰ্বাচিত হয়। মুকুল ৰায়ে ৰে’ল বিভাগৰ কেন্দ্ৰীয় ৰাজ্য মন্ত্ৰী হিচাপেও কাৰ্যনিৰ্বাহ কৰিছিল। ইয়াৰ লগতে তেওঁ কেন্দ্ৰীয় জাহাজ মন্ত্ৰালয়ৰ দায়িত্বতো আছিল।

তেওঁৰ ৰাজনৈতিক জীৱন বৰ্ণাঢ্য। এটা সময়ত তেওঁক ‘তৃণমূল ৰাজনীতিৰ চাণক্য’ বুলি কোৱা হৈছিল। কিন্তু তেওঁক লৈ হোৱা বিতৰ্কও কম নাছিল।

২০১৭ চনত মুকুল ৰায়ে তৃণমূল কংগ্ৰেছ ত্যাগ কৰি বিজেপিত যোগদান কৰে। ২০২১ চনৰ বিধানসভা নিৰ্বাচনত কৃষ্ণনগৰ উত্তৰ সমষ্টিৰ পৰা বিজেপিৰ টিকটত জয়লাভ কৰিছিল মুকুল ৰায়ে। কিন্তু নিৰ্বাচনৰ পিছত তেওঁ পুনৰ নিজৰ পুৰণি দল তৃণমূললৈ ঘূৰি আহিছিল। ইয়াৰ পিছতে বিৰোধী দলৰ নেতা শুভেন্দু অধিকাৰীয়ে দলত্যাগ বিৰোধী আইনৰ অধীনত বিধায়ক পদ অপসাৰণৰ দাবী জনায়। অৱশ্যে বিধায়ক পদৰ পৰা পদত্যাগ নকৰিলে মুকুল ৰায়ে।

বহুদিন ধৰি অসুস্থ হৈ আছিল মুকুল ৰায়। অসুস্থতাৰ পিছৰে পৰা তেওঁক ৰাজহুৱা স্থানত দেখা পোৱা যোৱা নাছিল।

মুকুল ৰায়ৰ পুত্ৰ শুভ্ৰাংশু ৰায়ে জনোৱা মতে, দেওবাৰে নিশা ১:৩০ বজাত তেওঁৰ পিতৃৰ মৃত্যু হয়। তেওঁৰ মৃতদেহ চিকিৎসালয়ৰ পৰা ঘৰলৈ লৈ যোৱা হ’ব। তেওঁৰ শেষকৃত্য সোমবাৰে সম্পন্ন কৰা হ’ব বুলি পৰিয়ালৰ সূত্ৰই প্ৰকাশ কৰিছে।