‘আফগানিস্তানৰ আক্ৰমণত নিহত ৫৫ পাক সেনা’; বিমান আক্ৰমণেৰে ‘প্ৰত্যক্ষ যুদ্ধ’ ঘোষণা পাকিস্তানৰ

আফগানিস্তানৰ সৈতে ‘প্ৰত্যক্ষ যুদ্ধ’ ঘোষণা কৰিছে পাকিস্তানে। বৃহস্পতিবাৰে নিশা আৰু শুকুৰবাৰে পুৱা কাবুল আৰু ইছলামবাদৰ আক্ৰমণ আৰু প্ৰত্যাক্ৰমণৰ মাজতে পাকিস্তানৰ প্ৰতিৰক্ষা মন্ত্ৰী খোৱাজা আছিফে কয়, ‘আমাৰ ধৈৰ্য্যই সকলো সীমা অতিক্ৰম কৰিলে। এতিয়া আমাৰ আৰু তোমালোকৰ মাজত প্ৰত্যক্ষ যুদ্ধ হ’ব।’

এতিয়ালৈকে আফগানিস্তানৰ তালিবান চৰকাৰে এই সন্দৰ্ভত কোনো মন্তব্য কৰা নাই যদিও পৰিস্থিতি অতি উত্তেজনাপূৰ্ণ হৈ আছে। আফগানিস্তানে বৃহস্পতিবাৰে নিশা পাকিস্তানৰ সীমান্তৰক্ষীক লক্ষ্য কৰি লয়। তাৰ কিছু ঘণ্টাৰ পাছত পাকিস্তানে আফগানৰ ৰাজধানী কাবুলত বিমান আক্ৰমণ চলায়। দুয়োখন দেশে এই আক্ৰমণৰ প্ৰতিশোধ লোৱা বুলি দাবী কৰিছে।

ইপিনে, আফগানিস্তানে ৫৫ জন পাকিস্তানী জোৱান নিহত কৰা বুলি দাবী কৰিছে। পিছত ইছলামাবাদে দাবী কৰিছে যে এই বিমান আক্ৰমণত ১৩৩ জন তালিবান যোদ্ধা নিহত হৈছে।

এই সংঘাতৰ সূত্ৰ বহুদিনৰ পৰা লুকাই আছে যদিও বৃহস্পতিবাৰৰ নিশাৰ পৰা পৰিস্থিতি পুনৰ উত্তপ্ত হৈ পৰিছে। কাবুলে দাবী কৰিছে যে পাকিস্তানে যোৱা দেওবাৰে আফগান সীমান্ত অঞ্চলত পাকিস্তানে সংঘটিত কৰা নিৰ্লজ্জ বিমান আক্ৰমণৰ প্ৰতিক্ৰিয়া স্বৰূপে পাকিস্তানৰ ওপৰত আক্ৰমণ সংঘটিত কৰিছে। পাকিস্তান সীমান্ত অঞ্চলৰ এটা সামৰিক চকীক লক্ষ্য কৰি লোৱা হয়।

আফগানিস্তানৰ প্ৰতিৰক্ষা মন্ত্ৰালয়ে নিশা চাৰি ঘণ্টীয়া অভিযানত ৫৫ জন পাকিস্তানী জোৱান নিহত হোৱা বুলি দাবী কৰিছে। আফগানিস্তানলৈ অনা হৈছে কেইবাজনো পাকিস্তানী জোৱানৰ মৃতদেহ। একাংশ জোৱানক জীৱিত অৱস্থাত বন্দী কৰা হৈছে। মুঠতে পাকিস্তানী সেনাৰ ১৯টা পোষ্ট আৰু দুটা বেৰেক ধ্বংস কৰা হৈছে। কাবুলে দাবী কৰিছে যে সেই অভিযানত আঠজন আফগান নিহত হোৱাৰ লগতে ১১ জন আহত হৈছে।

অৱশ্যে আফগানিস্তানৰ এই দাবী নাকচ কৰিছে পাকিস্তানে। সংবাদ সংস্থাৰ এক প্ৰতিবেদন অনুসৰি পাকিস্তানৰ প্ৰধানমন্ত্ৰী শ্বেহবাজ শ্বৰীফৰ মুখপাত্ৰ মুশ্বাৰফ আলী জাইদীয়ে দাবী কৰে যে আফগানিস্তানে কোনো পাকিস্তানী সৈনিকক বন্দী কৰিব পৰা নাই।

ইয়াৰ পৰিৱৰ্তে প্ৰতিশোধমূলক বিমান আক্ৰমণত ১৩৩ গৰাকী আফগান যোদ্ধা নিহত হৈছে। আহত হৈছে ২০০ৰো অধিক লোক। ৯ জনক বন্দী কৰা হৈছে। আফগানিস্তানৰ ২৭টা পোষ্ট ধ্বংস কৰা হৈছে। তদুপৰি কাবুল, পাকটিয়া আৰু কান্দাহাৰত সংঘটিত হোৱা আক্ৰমণত হতাহতৰ সংখ্যা বৃদ্ধি পাব বুলি দাবী কৰিছে পাকিস্তানৰ প্ৰধানমন্ত্ৰীৰ মুখপাত্ৰই।