ইৰাণ-ইজৰাইল যুদ্ধৰ পঞ্চম দিন: খামেনেইসহ ৮০০ নিহত, সংকটত উপসাগৰীয় অঞ্চলৰ এক কোটি ভাৰতীয়

আমেৰিকা যুক্তৰাষ্ট্ৰৰ ৰাষ্ট্ৰপতি ড’নাল্ড ট্ৰাম্প আৰু ইজৰাইলৰ প্ৰধানমন্ত্ৰী বেঞ্জামিন নেতানিয়াহুৰ নিৰ্দেশত ইৰানৰ ওপৰত চলোৱা যুটীয়া আক্ৰমণে পঞ্চম দিনত ভৰি দিয়াৰ লগে লগে সমগ্ৰ মধ্যপ্ৰাচ্যত এক ভয়াৱহ যুদ্ধৰ সৃষ্টি হৈছে। এই আক্ৰমণত ইৰানৰ সৰ্বোচ্চ নেতা আয়াতুল্লাহ আলী খামেনেইকে ধৰি দেশখনৰ কেইবাগৰাকীও শীৰ্ষ নেতাসহ আঠশৰো অধিক লোকৰ মৃত্যু হৈছে। সমান্তৰালভাৱে, লেবাননলৈকো সম্প্ৰসাৰিত হোৱা এই সংঘাতে উপসাগৰীয় অঞ্চলত কৰ্মৰত প্ৰায় এক কোটি ভাৰতীয় নাগৰিকৰ নিৰাপত্তাক লৈ উদ্বেগৰ সৃষ্টি কৰিছে।

প্ৰাপ্ত তথ্য অনুসৰি, যোৱা কেইদিনত নিহত হোৱা আঠশৰো অধিক লোকৰ বেছিভাগেই ইৰানৰ নাগৰিক। ইৰানে ইজৰাইলৰ লগতে সমগ্ৰ উপসাগৰীয় অঞ্চলত ড্ৰোন আৰু ক্ষেপণাস্ত্ৰৰে প্ৰতিশোধমূলক আক্ৰমণ অব্যাহত ৰাখিছে যদিও বৰ্তমান এই আক্ৰমণৰ তীব্ৰতা পূৰ্বতকৈ হ্ৰাস পোৱা পৰিলক্ষিত হৈছে। ইয়াৰ বিপৰীতে, ইজৰাইলে লেবাননৰ ৰাজধানী বেইৰুটত সামৰিক অভিযান চলোৱাৰ লগতে দক্ষিণ লেবাননত স্থলসেনা মোতায়েন কৰিছে। ৩ মাৰ্চ তাৰিখে ইজৰাইলী সেনাৰ বিমান আক্ৰমণত বেইৰুটৰ দক্ষিণৰ উপকণ্ঠ অঞ্চল ডাহিয়েহৰ কেইবাটাও অট্টালিকা ধ্বংসস্তূপত পৰিণত হয়। বৰ্তমান ধ্বংসস্তূপৰ মাজৰ পৰা ওলোৱা ধোঁৱাৰ কুণ্ডলীৰ মাজতে অগ্নিনিৰ্বাপক বাহিনীয়ে পৰিদৰ্শন আৰু উদ্ধাৰ অভিযান অব্যাহত ৰাখিছে।

এই যুদ্ধৰ মাজতে আমেৰিকাৰ ৰাষ্ট্ৰপতি ডনাল্ড ট্ৰাম্পে ইৰানৰ ভৱিষ্যত চৰকাৰ সন্দৰ্ভত এক তাৎপৰ্যপূৰ্ণ মন্তব্য কৰিছে। ট্ৰাম্পে ইংগিত দিছে যে আমেৰিকা আৰু ইজৰাইলৰ এই সামৰিক অভিযান সমাপ্ত হোৱাৰ পিছত ইৰানৰ চৰকাৰৰ “ভিতৰৰ কোনোবা” ব্যক্তিয়েই দেশখনৰ শাসনভাৰ গ্ৰহণ কৰাৰ বাবে আটাইতকৈ উপযুক্ত হ‘ব পাৰে।

মধ্যপ্ৰাচ্যৰ এই সামৰিক সংঘাতে কেৱল সক্ৰিয়ভাৱে জড়িত দেশসমূহৰ বাবেই নহয়, ভাৰতৰ বাবেও এক ভয়ংকৰ সংকট কঢ়িয়াই আনিছে। উপসাগৰীয় দেশসমূহত প্ৰায় এক কোটি ভাৰতীয় নাগৰিকে বসবাস কৰাৰ লগতে বিভিন্ন কৰ্মত নিয়োজিত হৈ আছে, যাৰ ফলত যুদ্ধৰ পৰিণাম ভাৰতৰ বাবেও উদ্বেগজনক হৈ পৰিছে।