নতুন যুদ্ধৰ সূচনা! পাক সেনা ঘাটিত ব্যাপক আক্ৰমণ আফগানিস্তানৰ

দুই চুবুৰীয়া দেশ আফগানিস্তান আৰু পাকিস্তানৰ সংঘাতে এতিয়া চৰম যুদ্ধৰ ৰূপ ধাৰণ কৰিছে। শুকুৰবাৰে পাকিস্তানৰ কোহাট সীমান্তৰ সংলগ্ন অঞ্চলত তালিবান বাহিনীৰ হঠাৎ প্ৰতিশোধমূলক আক্ৰমণৰ ফলত পশ্চিম সীমান্ত উত্তপ্ত হৈ পৰে।

সূত্ৰ অনুসৰি পাকিস্তানৰ বায়ুসেনাই আফগানিস্তানৰ ভিতৰত থকা কিছুমান বিশেষ ‘উগ্ৰপন্থী ঘাটি’ত আক্ৰমণ কৰাৰ পিছত তালিবান ক্ষুব্ধ হৈ পৰে। সীমান্তৰ সিপাৰে ৰকেট আৰু গধুৰ আৰ্টিলাৰীৰ গোলা আহি পাকিস্তানী সামৰিক চকীক লক্ষ্য কৰি লয়। এই ৰক্তাক্ত সংঘৰ্ষত দুয়োপক্ষৰ কেইবাজনো লোকৰ মৃত্যু হোৱাৰ বাতৰি পোৱা গৈছে, যাৰ ফলত দক্ষিণ এছিয়াৰ ভূ-ৰাজনীতিত এক নতুন অস্থিৰতাৰ মেঘ ঘণীভূত হৈছে।

শুকুৰবাৰে পুৱাৰে পৰা আৰম্ভ হয় এই আক্ৰমণৰ ঘটনা। পাকিস্তানী সেনাই দাবী কৰিছে যে তেহৰিক-ই-তালিবান পাকিস্তানে আফগান ভূমি ব্যৱহাৰ কৰি সীমান্তৰ সিপাৰে আক্ৰমণ চলাইছিল। ইয়াৰ প্ৰতিশোধ হিচাপে পাকিস্তানে তালিবান শিবিৰত বিমান আক্ৰমণ চলায়। কিন্তু সেই ঘটনাৰ কিছু ঘণ্টাৰ ভিতৰতে আফগান সীমান্তৰক্ষী আৰু তালিবান যোদ্ধাসকলে প্ৰতিশোধ ল’বলৈ আৰম্ভ কৰে। কোহাট আৰু ডুৰাণ্ড লাইনৰ বিভিন্ন ঠাইত প্ৰচণ্ড গোলাবৰ্ষণ আৰম্ভ হয়। বিমান আক্ৰমণৰ প্ৰত্যুত্তৰ জনাই তালিবানে স্পষ্টকৈ কয় যে তেওঁলোকে এক ইঞ্চিও মাটি এৰি দিবলৈ ইচ্ছুক নহয়।

পাকিস্তানী সামৰিক সূত্ৰৰ মতে, কোহাটৰ কাষৰীয়া জনজাতীয় অঞ্চলত তালিবানৰ আৰ্টিলাৰীৰ গুলীত কেইবাটাও সেনাৰ আন্তঃগাঁথনি ক্ষতিগ্ৰস্ত হৈছে। সাধাৰণ মানুহে নিজৰ জীৱনৰ ভয়ত গাঁও এৰি পলায়ন কৰিছে।

আনহাতে তালিবান চৰকাৰে কৈছে যে পাকিস্তানৰ এই ‘আগ্ৰাসন’ কোনো প্ৰকাৰে মানি লোৱা নহ’ব। তেওঁলোকে দাবী কৰে যে পাকিস্তানে শান্তি বিঘ্নিত কৰি আফগানিস্তানৰ সাৰ্বভৌমত্ব উলংঘা কৰিছে। এই মুহূৰ্তত দুয়োখন দেশৰ বৃহৎ সেনাবাহিনী সীমান্তত মোতায়েন কৰা হৈছে।

ইছলামবাদে এসময়ত তালিবানক নিজৰ ‘ঘনিষ্ঠ বন্ধু’ বুলি দাবী কৰিছিল। কিন্তু কাবুল দখল কৰাৰ পিছৰে পৰা দুয়োখন দেশৰ সম্পৰ্কৰ অৱনতি ঘটিবলৈ আৰম্ভ কৰিছে। টিটিপি বিষয় আৰু ডুৰাণ্ড লাইনক লৈ বিবাদত বিশেষভাৱে উত্তপ্ত। পাকিস্তানৰ বৰ্তমানৰ শাসক আৰু সামৰিক নেতাসকলৰ মতে তালিবান শাসিত আফগানিস্তান এতিয়া তেওঁলোকৰ নিৰাপত্তাৰ ক্ষেত্ৰত মূল বাধা।

নতুন দিল্লী আৰু ৱাশ্বিংটনে এই সংঘাত কিমান দূৰলৈ বিয়পে তাৰ ওপৰত চকু ৰাখিছে। কূটনৈতিক বিশেষজ্ঞৰ মতে, যদিহে এনেধৰণৰ সীমান্ত সংঘৰ্ষ শীঘ্ৰে নিয়ন্ত্ৰণলৈ অনা নহয়, তেন্তে ই এক বৃহৎ যুদ্ধৰ ৰূপ ল’ব পাৰে।

ইতিমধ্যে আফগানিস্তানৰ বিৰুদ্ধে আন্তঃৰাষ্ট্ৰীয় মঞ্চত অভিযোগ দাখিল কৰিবলৈ সাজু হৈছে পাকিস্তান চৰকাৰ। আনহাতে, তালিবানৰ যোদ্ধাসকলেও পিছুৱাই যাবলৈ অনিচ্ছুক। এনে পৰিস্থিতিত ডুৰাণ্ড লাইনৰ পৰিস্থিতি যিকোনো মুহূৰ্ততে অগ্নিগৰ্ভ হৈ পৰিব পাৰে।